Minister leh Agartala Mizote an inkawm

Tripura sorkarin Land Revenue & Settlement (LRS) department a kalpui dan zirchianga zin LRS minister B Lalchhanzova chuan November 28 zan khan Tripura State Guest House-ah Agartala-a Mizo awmte a kawm.

B Lalchhanzova chuan Tripura-a Mizo chengte chu Mizoram sorkarin a ngaihven thu sawiin, "Ram pawna Mizo chengte hmakhua ngaiin Mizoram Chief Minister office hmalaknain khawvel huapa Zofate kuahkhawm tur diaspora cell din a ni. Mizoram siamṭhat hna kal mekah ram chhung leh pawna awmten an ngaihdan zau taka an sawi theihna tur remchang siam tam a ṭul," a ti a, sorkar neitu mipuite rawtna leh ngaihdan ngaihthlak sak zel hi a remchang dan anga kalpui zel a ṭul thu a sawi.

Inkawmkhawmna ah hian Agartala Mizo Welfare Association leh Agartala Mizo Service hruaitute, Synod Mission Board hnuaia Tripura Mission Field, Baptist Church of Mizoram Field, Evan-gelical Church of Maraland leh Salvation Army hnuaia thawktute bakah Tripura sorkara Mizo officer leh zirlai eng emaw zat an tel.

Agartala-a Mizote chuan B Lalchhanzova hnenah hian an mamawh leh thil ṭulte an thlen a, a ni hian Tripura Supply minister Sushant Chowdhury nen an inkawmnaah heng an thu thlente hi a sawipui nghal.

Agartala Mizo Welfare Association (AMWA)-ah hian mi 500 vel an awm. Mizoram House emaw Mizo Run din chu Agartala Mizote mamawh tak a nih thu kalkhawmte hian an sawi a, Aizawl leh Agartala inkar thlawhtheihna thlawk awm lo te, kawngpui inkalpawhna ṭha tawk lo te, bus service an mamawh dan te, sumo service ṭhinte kal dan en fel sak an mamawh thute an thlen.

B Lalchhanzova hian AMWA-te'n a ṭul atana an hman atan Rs 10,000 pe in, Tripura Mission Field-ten Krismas an hmanna puitu atan Rs 5,000- a pe bawk.