Hunpui râlmuan theih dan tur sawiho

Kolasib district bawrhsap Robert C Lalhmangaiha kaihhrruaiin tun hnai khan sorkar hotu te, kohhran, khawtlang leh pawl hrang hrang hruaitute'n ralmuang taka kumin Krismas leh kumthar hman a nih theihna tura hâlpuah leh hâlmawi khapna thupek kalpui dan tur leh venhimna lama thawhho dan tur an sawiho.

Robert C Lalhmangaiha chuan, tun hnaia Diwali leh Dussehra hman zawh takah thuawih taka hâlpuah leh hâlmawi khapna zawm a ni chu lawmawm a tih thu a sawi a, "Kan hma lawka Krismas leh kumthar lo thleng turah pawh hâl chi, mihring hriselna khawih pawi thei khap chungchangah theihtawp kan chhuah a ngai. Hâlpuah leh hâlmawi hi sorkarin a phal loh mai bakah, kum upa leh hriselna chak lote'n an tawrh ber avangin theihtawp a khuahkhirh a ṭul," a ti a; mahni hmun ṭheuhah theihtawp chhuah turin kal khawmte a chah.

Kolasib SP David H Lalthangliana pawhin Police department aṭanga an inpuahchahnate a tarlang a; a tam thei ang ber mobile duty neih te, khawtlang leh VDP-te nen ṭanghoa hmalak an tum thute a sawi. December 2024-a Vehicle Zero Tolerance Drive an neih tur pawh theihtawpa thlawp turin district mipui a sâwm a ni.

Ṭhutkhawmah hian tlawmngai pawl leh khawtlang hruaitute chuan, kum danga an kalpui tawh ṭhin angin hmun hrang hrangah duty indah an tum thu an sawi a; kohhran hruaitute pawhin a ṭul anga sorkar hmalakna thlawp an tum thu an sawi bawk.