Indo-Myanmar Border Road enfiah

Adviser to CM (Technical) H Ginzalala, Champhai North bialtu MLA ni bawk chuan November 30, Inrinni khan Indo-Myanmar Border Road package 1 & 2 (Teikhang-Mimbung-Sinzawl) leh Ngopa-Saitual inkar kawng NH-102B a enfiah.

H Ginzalala hi NHIDCL hotute'n an ṭawiawm a, Indo-Myanmar Road (Tuivai kawng) Mimbung-Parva II chu national highway a nih theih nana hmalak dan tur an sawiho. A ṭul angin sorkar laipui hotute hnenah state sorkar leh NHIDCL-te'n an bawhzui dawn a ni.

NH-102B package III (Hliappui-Keifang kawng) chu tun ṭhál chhung ngeia zo tur leh fûrpui lai pawha harsatna a awm loh nana hna thawk turin H Ginzalala chuan NHIDCL hotute a ngen. NHIDCL hotute chuan, June 2025 hma ngeia zawh an tum thu leh Mizoram leh Manipur inpawhna kawngpui ṭangkai a nih thuai theih nan chak taka hma an la mek thu an sawi.

Adviser to CM chuan NHIDCL hotute chu ngil taka NH-102B kawngpui a kal theih nan uluk taka ruahmanna siam turin a chah bawk.