CSR buaipuitute an ṭhukhawm

Mizoram Corporate Social Responsibility (CSR) Cell-te chu an chairman TBC Lalvenchhunga, Adviser to CM (Planning & Finance) hoin November 29, 2024 khan a pisaah an ṭhukhawm a, hmalak zel dan tur an rel.

Ṭhutkhawmah hian November 13-14, 2024-a Bangalore-a United Nations Development Programme (UNDP)-te nen ṭangkawpa Stakeholder Consultation Meeting an buatsaih thlir let a ni a, meeting-a thu dahte bawhzui dan tur an rel a ni.

Stakeholder Consul­tation Meeting-ah Mizorama CSR hmanga hma la duh corporate foundation 15 leh civil society organisation 12 an tel thu tarlan a ni a; CSR pe thei foundation hrang hrangte kal dan leh an hmalakna huangte Mizorama CSR chhawr thei pawl leh sorkar agency, Income Tax Act hnuaia registration nei leh registration dil mekte hnena kimchang taka inhrilhhriatna (awareness programme) buatsaih thuai ni se, an ti.

Awareness prog­ramme hi December thla hapta hnihnaah buatsaih an rêl a; CSR Cell hnena inhriattir tawh pawl hrang hrangte bakah, sâwm tur chi nia an hriat dangte an chhinchhiah a, sawmna dawng lo, hetiang lam hmalakna kalpui theite chu CSR Cell member secretary phone number 9862868510 hnenah a rang lama inhriattir tur a nih thu sorkar thuchhuahin a tarlang.

Awareness buatsaih zawhah Stakeholder Consultation Meeting-a an zuk hmuh foundation leh CSO-te ko chhoin, inzawmna neihtir dan an ngaihtuah leh dawn a ni.