Hmunphiah buyer-te'n an lei theih bak Mizoram sorkarin a lei sak vek dawn

Chief minister Lalduhoma kaihhruaiin nimin khan CMO conference hall-ah Mizoram Agricultural Marketing Board (MAMB) chuan hmuhphiah leitu turte nena inremna ziah dan tur an duang a; sorkar rate bituk zata lei thei tur firm-te nen season khat chhung inremna siam an remti a, "Buyer-te'n an lei theih bak zawng chu sorkarin lei mai se," an ti.

Ṭhukhawm chuan hmunphiah lei thei turte zawnna (expression of interest) neih tawhna aṭanga sorkar rate bituk zata lei thei tur firm-te nen season khat chhung inremna siam an remti a, "Buyer-te'n an lei theih bak zawng chu sorkarin lei mai se," an tih bakah, buyer-te'n sorkar kudam an hman theih dan tur ruahmanna an duang nghal a, kudam hman theihte hi a ṭul zual chei mek a nih thu tarlan a ni.

Kudam hmang duh empanelled buyer-te'n a hming chauha luah man pein an hmang thei dawn a; District Agricultural Marketing Committee (DAMC) aṭanga secondary collection centre atana hman theih list an rawn thehluh pawh an pawm.

Ṭhutkhawma tarlan danin, December 6, 2024 khian Baptist Centre, Falkland-ah MAMB leh Agricultural and Processed Food Products Export Development Authority (APEDA) ṭangkawp chuan buyers-sellers meet an buatsaih dawn a; ram dang (foreign) company 13 leh India rama company 22-te'n an rawn tel tur thu an tichiang tawh.

He hunah hian Agriculture & Farmers Welfare minister PC Vanlalruata, Commerce & Industries minister F Rodingliana, Food Civil Supplies & Consumer Affairs minister B Lalchhanzova, adviser to CM (Handholding) Dr KC Lalmalsawmzauva leh MAMB member-te an tel a ni.