Maxi cab-ah arte phurh phal lo

State Transport Authority (STA) Secretary chuan District Transport Officer (DTO)-te hnenah lehkhathawnin, maxi cab-ah danin arte phurh a remtih loh thu leh khauh lehzuala hmala tura ngen leh hriattir an nih thu a tarlang.

STA Secretary chuan DTO-te lehkha a thawnah Arte Phura Eizawng Pawlte hnen aṭangin maxi cab-a arte phur ṭhinte laka hmala tura ngenna dawn a ni tih tarlangin, "Ran (animal) te hi public transport a phur tur chuan CMV Rules, 1989 Rule 125-E in a phut anga lirthei siam danglam hnuah phalna pekchhuah ṭhin a ni. Tun hnaiah pawh ran phurh phalna licence eng emaw zat pekchhuah a ni tawh," a ti.

Maxi cab-te hi mihring phur chi an ni tih tarlangin STA Secretary chuan, "Mizoram Motor Vehicle Rules 1995, rule 103-in a tarlan angin, passenger bakah mimal thil (personal goods) bak bungrua phurh phal a ni lo," a ti a, DTO-te chu maxi cab-te'n sumdawnna atana arte an lo phur ṭhin hi MV Rules kalh a nih avangin khauh lehzuala hma lo la turin a ngenin, a hriattir a ni.