LESDE hotute leh ILO aiawhte inkawm

Labour, Employment, Skill Development & Entrepreneurship (LESDE) minister Lalnghinglova Hmar kaihhruaiin nimin khan Secretariat conference hall-ah International Labour Organization (ILO) deputy director Satoski Sasaki leh senior programme officer Divya Verma-te chu LESDE department hotute nen an inkawm.

Lalnghinglova Hmar chuan Mizoram ṭhalaite leh kut hnathawktute tana hmalakna duhawm tak thlen thei tura ILO aiawhte'n Mizoram an rawn tlawh chu lawmawm a tih thu leh thawhhona ṭha neih pui ngei a inhuam thu a sawi.

ILO dy. director Satoski Sasaki chuan, ILO hian khawvel puma kut hnathawktute dinhmun chawisan leh venhimna kawngah hma a lak mek thu sawiin, "Hmalakna kal zelah Mizoram nena thawhdunna ṭha a awm theih nana lo kal kan ni," a ti a; Divya Verma pawhin ILO hnuaia programme leh project kalpui hrang hrangte sawifiahin, Mizoram tana hmalakna awm thei apiangah kawng hawnsak an inhuam thu a sawi.

He hunah hian LESDE secretary Lalmalsawma Pachuau pawhin thusawiin, Mizoram ṭhalaite tan Care & Hospitality Sector hnuaia hnathawk tur mamawhna a san thu leh he sector hnuaiah hian hmeichhiate'n dinhmun zau tak an chan thute a sawi a; State Flagship Programme Handholding Policy (Bana Kaih) hnuaiah hnathawktute tana sorkarin ruahmanna a siamte a tarlang bawk.

LESDE director John Ṭanpuia chuan, Mizoram hnathawktute dinhmun tlangpui leh hmalakna hrang hrangte a sawifiah bakah, Mizoram Youth Commission (MYC) secretary V Lalmuanpuii'n MYC hmalak mekna leh hmachhawpte a tarlang bawk a ni.

Inkawmhona zawhah hian ILO hotute leh LESDE hotute chuan LESDE Directorate Committee Room-ah hmalakna kalpui dan tur hrang hrang an sawiho a; ILO official-te hian December 4, 2024 khian Delhi an pan leh dawn a ni.