KHAWTHLIR

Minister-in tlawh

Rural Development minister Prof. Lalnilawma chuan nimin khan Khawbung RD Block-in ‘Project Rotling - Hmasawnna Rahbi Thar’ hnuaia hma an lakna, ‘Project Sustainable Livelihood through Ericulture at Chhingzawl Ram’ a tlawh a; Tuipuiral Games 2025 neihna tur Samthang Playground laih zauh dan tur a hmunah a enfiah nghal.

Methamphetamine kg 22.676 man

Assam Rifles leh Zokhawthar Police ṭangkawp chuan nimin khan Ṭiau lui kamah methamphetamine kg. 22.676, cheng vbc. 68.03 man hua chhut an man. Methamphetamine hi buara ip chhunga dah niin, a kengtu chu man a nih hmain Myanmar lamah a tlan chhe hman.

MSU hruaitu

Mizo Students' Union (MSU) chuan November 29 khan Lal Thanhawla Auditorium-ah hruaitu thar an thlang a; president-ah B Lalkhawngaihzuala, vice president-ah Roluahpuia, gen. secretary-ah Samuel Lalruatdika, asst. general secretary-ah Lalruatpuia, treasurer-ah Lalrampanmawia leh fin. secretary-ah Lalhmangaihzuala-te an thlang.

Ṭanpuina hlan

Siaha District AIDS Prevetion & Control Committee (DAPCC) chuan nimin khan World AIDS Day, 2024 pualin ruihhlo ngai chhawmdawlna, Kalvari Healing Centre leh Agape Home-ah ṭanpuina - buhfai, tél, alu leh a dangte an hlan. AIDS chungchang an zirtir nghal bawk.

Kawrah thiin hmu

December 1, Pathianni chhun dar 12:55 khan PC Lalthankima (66) h/o Lalnunnemi, Kolasib New Diakkawn chu an kawmthlang kawrah thia hmuh niin, chesual palha lum nia rin a ni. PC Lalthankima hi Inrinni zan khan a ṭhiante nen an inkawm a, a chhungte'n zingah an hmuh mai loh avangin an zawng ru deuh a, an kawmthlang kawrah a ruang hi an hmu. Nimin chhun khan vuiliam a ni.