Hun rei lote chhungin ṭhalai ṭhahnem takin MYC hmalaknain hna an hmu - MYC Chairman

ZPM chuan nimin khan an pisaah chhung inkhawm an hmang a, thusawitu Mizoram Youth Commission (MYC) chairman Malsawmzuala Ralte chuan sorkarna an siam aṭanga hun rei lote chhungin ṭhalai ṭhahnem takin MYC hmalakna kaltlangin hna an hmuh tawh thu a sawi.

Malsawmzuala Ralte chuan MYC chu Act of Legislature hmangin kum 2008 khan din a nih thu sawiin, "Kum 16 zeta upa a ni tawh. Mizo ṭhalaiten hna an zawnna kawnga ṭanpui leh kawng kawhhmuhtu tura din a ni. Kan hotute duhsakna changin kumin January 22 khan MLA ni lo chairman hmasa ber turin ka zawm ve. Hnathawh tur awm sa a awm hran lo a, thawh tur leh tih tur dap chawpa, zawn chawp zel a ngai a ni," a ti.

MYC office Aizawlah hian, ṭhalai hna zawng mekte tan group A leh B coaching class, zing, chhun leh tlaiah te kalpui mek a nih thu sawiin MYC Chairman chuan, "Zirlai 280 vel zet kan nei mek. Hei bakah hian one day workshop on career guidance and counselling kan buatsaih a, MCS, MPS, KIS, MF&AS, MSS leh MFS-ten hun an rawn hmang a, zirlaiten hlawk thlak an ti hle," a ti a, ASI exam turte pualin mock exam an buatsaih thu a sawi bawk.

Aizawl bakah hian Lunglei, Siaha, Champhai leh Kolasibahte coaching class an kalpui mek tih sawiin Malsawmzuala Ralte chuan, "Kan coaching class atan hian fee kan ti tlawm hle a, sorkar hna zawng mek ṭhalaite pawhin min bawh ve hle. Kum tharah hian a remchan angin, Serchhip leh Mamitah youth centre din theih kan inbeisei," a ti.

Malsawmzuala Ralte chuan Mizoram University incubation centre-te nen thawk hoin December chhung hian MYC office-ah Enterpreneurship Development Centre din turin hma an la chho mek tih sawiin, "Livelihood business incubator buatsaih kan rel bawk. India leh Taiwan-in hnathawk tur lak luh kawngah inremna an siam bawhzuiin tunah hian Mizo nula pahnihten August aṭang khan Taiwan-ah Chinese ṭawng zirin an awm mek a ni," a ti a, Honda company-te pawh hotel management training MYC office-ah batch khat an zawh tawh thu a sawi.

MYC Chairman sawi danin, Indigo Arlines leh Air India-te nen thawh ho dan tur an sawi ho mek a, air hostess hi hmeichhe tan chauh a nih avangin mipa rawn dil ve tum an awm nual a, anni hian ground crew kan la leh thei a nih chuan an dil ve thei dawn a ni. Tin, TATA Trust-te nen pawh an indawr mek a, an tih fel chuan hotel a thawk tur front office assistant, house keeping-ahte training tur an la dawn a, Guwa-hati-ah an training ang.