IPR Minister-in Sikkim press tour-a kalte a kawm

Information & Public Relatons (IPR) minister Dr Vanlalthlana chuan nimin khan a pisaah IPR department bultuma Sikkim press tour-a kal Mizoram Journalist Association (MJA) member-te leh IPRO-te thingpui inpuiin, an tawnhriat leh Mizoram tana hmasawnna awm thei turte a sawpui.

Dr Vanlalthlana chuan, hlawhtling taka press tour neih a ni leh dam taka Mizorama an lo lêt leh chu lawmawm a tih thu a sawi a, "Mizoram pawhin tourist tam zawk hîp turin hmunhma leh tlawh tur ṭha tak tak a nei a, inzawrh (marketing) lamah ṭan lak a ṭul hle a ni. Mahni inpho lâr a, tourist hîp thei turin MJA member-te thuziah kawngah theihtawpa au chhuak turin ka sawm che u a ni," a ti.

Mizoram hmun mawi leh tlawh tlak ang angte cheiṭhat kawngah pawh tun aia ṭan lak a ṭul thu leh, mipuite pawh tourist dawng thiam tura hawihhawm kawngah nasa zawka ngaihtuahna sen a pawimawh thu sawiin Minister, "Press tour neih a lo ni fo tawh ṭhin a, rualawhna nen kan lo lêt ṭhin. Rilrua ngaihtuahna kan neih leh Mizoramah pawh tih ve theih nia kan hriatte tihlawhtling turin department hrang hrangte beng thleng phak tura hmalak thiam pawh a ṭul hle," a ti a; hlawhtling taka press tour neih a nih zel theih nan rawtna fel fai tak siam a, tour neih leh dawna en lêt theih tur ruahmanna siam ṭhin turin official-te a chah bawk.

He hunah hian tour-a kalte chuan Sikkim an tlawhnaa an tawnhriat hrang hrang - rual awhna leh Mizorama tih ve tura ṭhate leh ram tana ṭangkai tura an hriatte IPR Minister hnenah hian an thlen a; IPR Minister chuan theihtawp chhuahpui a inhuam thu sawiin, a ṭul anga hmalak a nih theih nan MJA-te chu a kaihhnawih department-te pawh sawipui turin a ngen a ni.

Sikkim Press Tour-a kalte puala thingpui inhonaah hian IPR secretary Betsy Zothanpari Sailo, addl. secretary V Ruatsanga, director C Lalnunkima, jt. director K Vanlalsangi leh MJA president Lalrambuatsaiha bakah Sikkim press tour-a kalte an tel.