National Pollution Control Day pualin Eco-Club naupangte an hnatlang

Nimin kha National Pollution Control Day a ni a, India ram pumah faina leh thianghlimna inzirtirna leh faina hnatlang neihna hun atan hman niin, Mizoramah pawh Mizoram Pollution Control Board (MPCB) hmalaknain district hrang hrangah hman a ni.

Pollution Control Day denchhen hian Mizoram district hrang hrangah District Education Office (DEO) leh MPCB kaihhruainain School Eco-Club naupangte'n kawngpui leh lui dung thenfai hnatlang rûnpui an nei a, mi 5,000 chuang an thawkchhuak niin sorkar thuchhuahin a tarlang.

Aizawlah chuan MPCB staff-te leh sikul thlanchhuah bika Eco Club member-te’n Tuikual lui, Lawibual lui leh Chite luia hmankhat daih sarâng/bawlhhlawhte chharfai hnatlang an nei a, he'ng an bawlhhlawh chhar khawmte hi Tuiriala bawlhhlawh paihna hmunah paih a ni.

National Pollution Control Day 2024 pual hian MPCB chuan ‘Clean Air, Green Earth’ tih thupui hmangin thlalak intihsiakna (photography competition) a buatsaih mek a; Online Poster Making Competition leh public campaign-te a buatsaih tawh a ni.

MPCB chairman Liankima Lailung chuan, "Ṭhangthar lo la awm leh zel turte tana chênna tlâk khawvel kan hnutchhiah theihna turin tuna chêng mekte hian uluk taka kan enkawl a ṭul a," a ti a; MPCB member secretary C Lalduhawma pawhin, "India ram khawpui zinga boruak thianghlim ber kan nih mekna vawnghim zela hâlpuah leh bawlhhlawhte hâl mai mai lo turin mi tinte kan ngen a ni," a ti bawk.

National Pollution Control Day hi kum tin December 2-ah hman ṭhin a ni a, he ni hi kum 1984-a Bhopal Gas Tragedy-a thite hriatreng nana tih niin, mipuite hnena pollution chungchang inzirtir nan leh environment humhima tibawlhhlawh lo zâwnga khawsa tura infuih thar nana hman ṭhin a ni.