Khualbûk pariatin endiknaah rating hmu pha lo

Lunglei District Level Committee on Swachhata Green Leaf Rating (SGLR) leh District Water & Sanitation Committee (DWSC) chu an chairman Navneet Mann, district bawrhsap hoin DC conference hall-ah an ṭhu. Lunglei district-a khualbûk 13-te thlì leh bawlhhlawh sawngbawl/thehthang dan endiknaah khualbûk pariatin rating an hmu pha lo tih tarlan a ni.

Sorkar laipuia Ministry of Jal Shakti hnuaia department of Drinking Water & Sanitation leh Ministry of Tourism ṭangkawpin India rama khualbûk (hotel/homestay/government accommodation)-te'n thianghlimna leh hriselna kawnga hma an sawn theih nana an chet thianghlim dan azira thliar hranna, Swachhata Green Leaf Rating (SGLR) kalpui tura an ruahman angin Lunglei district-a khualbuk 13 chu SDO (Sadar) kaihhruaina hnuaiah Verification Sub-Committee chuan October 8 - 14, 2024 chhung khan an awmna hmunah kal chilhin an endik a ni.

Lunglei district-a khualbûk 13 endiknaah inthiarna thlì (faecal sludge), bawlhhlawh sakhat (solid waste) leh tuichhia (grey water) an sawngbawl leh thehthang dan azirin mark leh rating pek an ni a; rating hi chi thum, a hniam lam aṭangin 1 Leaf, 3 Leaf leh 5 Leaf a awm. Khualbuk 13 zinga pali - Circuit House Lunglei, Tourist Lodge Zotlang, Hotel Malawm leh Ono Hotel-te chu 3 Leaf rating pek niin, Elite Hotel leh Hotel Albasta-te chu 1 Leaf rating pek an ni a, a dang pariatin rating an hmu pha ve lo a ni.

Verification Sub-Committee te'n rating an pek hi nimina District Level Committee hian pawmpuiin, rating hmu sate'n rating sang zawk an hmuh theih nan leh rating la hmu pha lote'n an hmuh ve theih nan theihtawpa hmalak nise, an ti.

Ṭhukhawm chuan November 19 - December 10, 2024 chhung atana 'World Toilet Day' puala inthiarna in ṭha leh thianghlim ngaih pawimawh inzirtirna beihpui thlakna (campaign) kalpui mek chungchang sawiho a ni a; he campaign hi mimal leh vantlang inthiarna thawmṭhat leh cheibawl hna thawh nan te, ek-in him ṭha pawimawhna uar zawka inzirtirna hun atante ruahman a ni.

Lunglei district-ah hian inzirtirna hrang hrang kalpui a nih rual hian thingtlang (rural area)-a vantlang inthiarna hmun, community sanitary complex (CSC) 21-te tan inelna buatsaih tum a ni bawk.