UPC-in No-Tobacco Week hawng

UPC-NEI hnuaia Aizawl East District (AED) Thianghlimna Committee huaihawtin December 2, Thawhṭanni zan aṭang khan vaihlo leh a kaihhnawih dona hapta, No Tobacco Week hman ṭan a ni a, UPC AED superintendent Rev. R Laltlankima'n a hawng.

Hapta hawnna inkhawm hi District Headquarters biak-in, Ramhlun South-ah neih a ni a, Thianghlimna Committee chairman Rev. Rosanga Kawlni-in a kaihruai. AED secretary Rev. H Lalropuia'n hunserh a hman bakah, hawnna inkhawma tel mi 250 velin vaihlo leh a kaihhnawih do a, insûm tur leh sim turin thu an tiam.

UPC-NEI rorelna sangin a phût ang leh Thurin Bu (Article of Faith)-in a phût angin UPC-ah hian rawngbawlna chelh tur leh pulpit rawngbawlna nei tur chuan zûk leh hmuam, ruih theih thil lakah fihlim a ngai a ni.

UPC NEI hnuaia Aizawl East District huam chhungah hian kohhran 186 leh member 28,086 an awm a; No Tobacco Week hi December 8, 2024 thleng an hmang dawn a ni.