Mizoramah Rualbanlote Ni hman a ni

Nimin December 3 kha International Day of Persons with Disabi-lities (Rualbanlote Ni) a ni a, Mizoram hmun ṭhenkhatah hman niin, Aizawlah chuan Social Welfare minister Lalrinpuii hoin kawngzawh a nih bakah Zarkawt Recreation Centre-ah hun hman a ni.

Social Welfare & Tribal Affairs department, Federation of Mizoram Disabled Organisations (FMDO) leh National Institute for Locomotor Disabilities - Regional Centre-te chuan Rualbanlote Ni pual hun hmanna hi an huaihawt a; rualbanlo te, an chhungte leh an puala thawktute leh ngaihventu mi eng emaw zat an tel.

Canteen Kual aṭangin Zarkawt Recreation Centre thleng kawngzawh huaihawt a ni a, Zarkawt Recreation Centre-ah intihhlimna hun hman a ni. Rualbanlote’n music band, zai, lâm leh lemchante an entir a, zaithiamte'n an hmanpui bawk.

Zarkawt Recreation Centre-a hun hmannaah Social Welfare minister Lalrinpuii chuan, tun hma deuh chuan Mizo khawtlangah rualbanlote en hniamna leh nawmnah taka chhaih a hluar thu a sawi a, "Hei hi upate'n ngaimawhin, ‘Piansualin tlai luat a nei lo’ tiin min zilhhau ṭhin a ni. Pianphunga rualbanlote dinhmuna din hi duh lo vek mah ila, anmahni dikna leh chanvo lam erawh chu kan ngaihthah leh hle si ni hian a la hriat a ni," a ti.

Minister Lalrinpuii chuan, rualbanlote hmasawnna atan sorkarin chak takin hma a la tih sawiin, "Persons with Disability Wing hnuaiah Commissioner kan nei tawh a, mipui dawr ṭhin department-te leh sorkar hmun pawimawh chi hrang hrangah pianphunga rualbanlote tan kawng awlsam ramp, signage leh a dangte a awm ṭha em tihte vilin theihtawp chhuah a ni," a ti a; sorkar leh NGO-te hmalaknain rah ṭha a chhuah mek thu a sawi.

Sorkar hna laknaah rualbanlote tan 3% hauh a nih thu sawiin, "Hna pangngai thawh mai ni tawh loin, pianphunga rualbanlote hian kan tling tawka theihna kan nei a ni tih lantir theih nan kumin thupuiah pawh, 'Amplifying the leadership of persons with disabilities for an inclusive and sustainable future' kan hmang a ni," a ti.

Rualbanlote Ni hi Social Welfare & Tribal Affairs bultumin Lunglei, Siaha leh Champhaiahte pawh hman a ni.