Eng hna pawh ni se thawh chhuah neih hrim hrim a hlu - LESDE Minister

Labour, Employment, Skill Deve­lopment & Entrepreneurship (LESDE) minister Lalnghinglova Hmar chuan nimin khan Phunchawnga Women Centre-a puanṭhui zir zo (2024 batch) mi 33-te thlahna a hmanpui a; eng hna pawh ni se, thawh chhuah neih hrim hrim a hlut thu a sawi.

LESDE Minister chuan, eizawnna kawng hrang hrang ṭha tak tak a tam thu sawiin, "Sorkar pawhin skill hrang hrangah training a buatsaih ṭhin a, Women Centre-in hemi zawnga hma a la hi a fakawm. Ei duh si, ei tur zawng peih si lo nih hi a zahthlak a, eng hna pawh, thawh chhuah zat a tam emaw, a tlem emaw, thawh chhuah neih hrim hrim hi a hlu a ni," a ti.

Women Centre kaltlanga puanṭhui zir chhuak mi 300 chuang an awm tawh chu lawmawm a tih thu leh 2024 batch-a zir chhuak mi 33-te a lawmpui thu sawiin Minister chuan, an thil zir chhuah chu eizawnna ṭha takah an chantir ngei a beisei thu a sawi.

Lalnghinglova Hmar chuan, mahni kutkawih eizawngte zingah thawh chhuah zat tipung turin lian zawka hmalak a pawimawh thu a sawi a, "Life skills (nun dan thiamna) thiam a pawimawh. Chhungkaw enkawl danah pawh mahni tu leh fate’n life skill ṭha an neih theih nana kaihhruai thiam a ṭul," a ti.

Inkhawmah hian puanṭhui zir zote hnenah certificate leh memento hlan a ni a, tefung hrang hranga ti ṭhate hnenah Minister-in puanṭhui khawl a hlan. Puanṭhui khawlte chu Usha Enterprise, Tuikual Pastor Bial Kohhran Hmeichhia leh Dawrpui Kohhran Hmeichhia-te'n an pek a ni.

Women Centre-a thawktu châwl turte thlahna hun hman nghal a ni a, Amawii Hero chuan Women Centre hnenah scooty pakhat an hlan bawk.

Women Centre aṭang hian puanṭhui zir chhuak mi 314 an awm tawh a, chu'ng zinga 70% vel chuan puanṭhuiin ei an zawng mek tih tarlan a ni.