'Krismas pual thisen pek' hawn a ni

Kumin December thla chhungin Mizorama blood bank hrang hrangah 'Krismas puala thisen pek' kalpui leh ṭan a ni a, nimin khan Civil Hospital, Aizawl Blood Bank-ah medical superintendent Dr ST Lalruatfela'n a hawng.

Krismas puala thisen pek hi AVBD, MSACS leh blood bank hrang hrangte huaihawt a ni a, kumin December thla chhung zawng kalpui a ni dawn. Blood bank-ah kalin thisen pek theih a ni a, thisen petute hnenah ei tur tuihnai tak leh thilpek pek zel a ni ang.

Krismas puala thisen pek hawnna inkhawm hi Association for Voluntary Blood Donation (AVBD) vice president Dr Zoramdinthara'n a kaihruai a; Dr ST Lalruatfela chuan, Krismas puala thisen pek huaihawt chu Kristianna leh Mizo nihna nen a inhmeh thu a sawi.

Dr ST Lalruatfela chuan, Mizo ṭhalai tam tak ruihhloin a tihbuai laiin thisen pe tur ṭhalai tam tak an la pung khawm thei tih sawiin, "Kan ṭhalaite mi dang tana luang chhuak tura kan thisen hlu tak pe tura heti zat in pung khawm hian mi ṭha, mi dang tana luang chhuak kan la tam em em a ni tih a entir. Ṭhalai, mi dang tana ke pên chhuak kan la awm hi Mizo nih tinuamtu leh min tithlamuangtu a ni," a ti.

Krismas puala thisen pek huaihawtnaa hma latu AVBD chungah a lawm thu sawiin Dr ST Lalruatfela chuan, "Hospital ringawt hmalaknain damlote thisen mamawh kan phuhru thei lo. Anni hmalakna azarah mi rethei zawkte leh mamawh ngawih ngawihte'n thisen an dawng thei a ni," a ti a; Krismas puala thisen pe turin ṭhalaite a sáwm.

Nimina Krismas puala thisen pek hawn ní-ah hian Civil Hospital blood bank-ah mi eng emaw zatin thisen an pe nghal a; Mizo Higher Secondary School zirlai mipa 77 leh hmeichhia 18-te chuan Mizoram HSS Games 2024-a an champion lawmna ni pahin thisen unit 95 an pe a ni.