MNF-in sorkar demna resolution an siam

Nimin khan Vanapa Hall-ah MNF National Executive Meeting neih a ni a; resolution siamin, MNF president Zoramthanga leh a thawhpui elected office bearer-te kaih­hruainaah rinna an nghah thu leh ZPM kaihhruai sorkar an demna thu an tarlang.

MNF ṭhutkhawm hi president Zoramthanga'n a kaihruai a, MNF Danbul ennawnin, siamṭhat ngaite siamṭhat an remti a, an hmalak zel dan turte an rêl bakah, resolution chi 10 an pawm a ni.

MNF hian an resolution-ah, "Pu Zoramthanga, President, MNF leh a thawhpui elected OB-te kaihhruaina hnuaia tun hnaia hnehna kan chan leh party-in nasa taka hma kan sawn zel avangin an chungah rinna leh beiseina kan nghat tlat a ni," an ti a; Krismas leh kumthar thlamuang tak, hlim leh lawm taka hmang turin Mizoram mipui duhsakna an hlan.

MNF chuan, ZPM kaihhruai sorkarin sum harsatna chhuanlama nasa taka mipuite chhiah leh thil dang tam tak hmanga a rûn mek laiin Chief Minister leh a ṭhuihhruaite nasa takin an inhaivûr niin an tarlang a, "Kan dem tak zet a. Mipui chan hui a, tihretheiha kan awm mek hi a pawi kan tiin, he tawrhna laka chhuak tur hian MNF chuan theihtawp a chhuah zel dawn a ni," an ti.