Khawbung RD Block silver jubilee lawm

Khawbung Rural Development (RD) Block chuan nimin khan Khawbung BDO multipurpose hall-ah silver jubilee an lawm a, Rural Development minister Prof. Lalnilawma'n a hmanpui.

RD Minister chuan, sorkar laipui leh state sorkar chuan thingtlang mite hmasawnna turin scheme ṭha tak tak an kalpui ṭhin thu a sawi a, "Khawbung RD Block-in kum 25 a lo tlin takah chuan scheme kalpui tawhte leh scheme kal mekte thlir chungin kan dinhmun leh kan hmabakte engtin nge kan kalpui ang tih kan inzawh thar fo a ṭul," a ti.

Prof. Lalnilawma chuan, "Kum 2011 chhiarpui behchhana in sak ṭanpuina (PMAY-G) kalpui mek chu in leh lo la nei lo, ṭanpuina mamawh tak takte thlan chhuah an nih theih nan siam rem tum mek a ni," a ti a; Border Area Development Programme (BADP) chu Vibrant Village Programme (VVP)-a thlak a, thiamthil tihpun (skill development) lamte pawh telh chhoh tum a nih thu a sawi.

Sorkarin hmasawnna ruhrel leh hmunhma a dinte neitu rilru pu chunga khawtlang leh mipuite'n an enkawl pui a ṭul thu sawiin Minister chuan, "Sorkar department-te chu hmasawnna hna thawh kawngah kan ṭanho thiam a pawimawh a, mipuite'n eizawnna mumal an neih theihna lam hawi zawnga hmalak thiam a ṭul," a ti.

Khawbung RD Block hi East Lungdar RD Block hnuaiah June 20, 1995 khan additional block-ah dah a ni a, November 26, 1999 khan RD block puitlingah dah a ni. Tun thlengin Additional Block Development Officer (ABDO) pahnih leh BDO 16-in an ṭhutchilh tawh.

Khawbung RD Block hnuaiah hian khaw 25 a awm a, BDO hoin thawktu 44-in an enkawl mek. Silver jubilee lawmna hi HB Lalnuntluanga'n a kaihruai a, BDO Lalchhandami Pachuau leh Tuipuiral VC Association president C Lalrintluanga ten thu an sawi bakah, RD department joint director Vanlalrova'n jubilee souvenir a tlangzarh a ni.