Eizawnna tlak tuipui turin zirlaite chah

State Council of Educational Research and Training (SCERT) Directorate chuan nimin khan Chanmari YMA Hall-ah Aizawla sorkar high school zirlaite pualin Career Awareness Campaign an buatsaih a; School Education minister Dr Vanlalthlana'n hmanpuiin, zirlaite chu eizawnna tlak thil tuipui turin a chah.

Dr Vanlalthlana chuan, zirlaite chu sorkar hna chauh hna a nih lohzia hre chiang turin a chah a, "Thiamthil hmanga mahni kea ding tur leh eizawnna tlak turin in thiamnate in tuaihriam a pawimawh. Eng hna pawh thawk dawn u la, lehkha zir ṭhat a ngai a, mahni kea ding tur pawhin taima taka lehkha zir a ngai. Huaisen takin in tuina zawnah kal u la, eizawnna tlak ngei tuipui ang che u," a ti.

Thiamna a sang zel tih sawiin Minister chuan, "Eizawng rual in nih meuh chuan artificial intelligence (AI) nen hna in inchuh tawh dawn a, chuvangin, AI chhawr ṭangkai thiam tur leh thiamna tihpun (skill development) ngai pawimawh ang che u. Eizawnna tur kawng in zawnnaah eng nge kan ramin a mamawh, a market a ṭha em, tihte ngaihvenin, âwl zawn thiam a ṭul," a ti a; eizawnna engah pawh Pathian ṭih a pawimawh thu a sawi.

Inkhawmah hian SCERT director Caroline Zoramthangi leh joint director Zoramthangi Ralte te pawhin thu an sawi a; resource person - Lalhriatzuala, Chiko Coaching Centre leh Lalhruaitluanga, Zocareer Solution-te’n eizawnna chungchanga thil pawimawhte zirlaite an hrilhfiah a ni.