Healthy Lunglei District Campaign-a MṬKP nena thawhhona tur hawng

Lunglei DC Navneet Mann chuan nimin khan DC conference hall-ah Healthy Lunglei District Campaign kalpui mek hnuaia Mizoram Ṭhalai Kristian Pawl (MṬKP) nen ṭangkawpa hriselna chungchang beihpui thlakna tur pilot project a hawng.

Healthy Lunglei District Campaign pilot project hnuaiah hian district thuneitute leh MṬKP ṭang dun chuan Lungleia pastor bial pathum - Bazar Veng, Rahsi Veng leh Theiriat bial leh an hnuaia ṬKP unit 14-teah hmalak a ni dawn. Zing kara kea kal, thla kipa infiamna hun huaihawt, kohhran/ṬKP chanchinbu leh social media kaltlanga hriselna lam hawi inzirtirna puanzar, member-te hriselna dinhmun endik, inzirtirna thuziak sem, intlansiak, thu inziahsiak leh hmalakna remchang dangte kalpui tura ruahman a ni.

Lunglei Bawrhsap chuan, Healthy Lunglei District Campaign hnuaiah hriselna dinhmun endikna leh hriselna atana nunphung ṭha inzirtirna kalpui mek a nih thu leh kalpui chhunzawm zel tum a nih thu a sawi a, "Natna inkai chhawn theih chi laka inven fimkhur a pawimawh ang bawkin inkai chhawn theih loh chi vei lo turin ei leh in leh nunphung uluk a pawimawh. Hriselna dinhmun endik leh natna hmuh chhuah hma hi inenkawlna ṭha nei tura ṭul hmasa a ni," a ti.

Healthy Lunglei District Campaign hi June 12, 2024 khan kalpui ṭan a ni a, hmun hrang hrangah hriselna dinhmun endik leh inzirtirna kalpui tawh niin, November 21, 2024 thleng khan mi 3,251-te hriselna dinhmun endik a ni tawh.

Endik tawhna aṭang hian thisen sang nei hriat chhuah thar mi 162 leh zunthlum hmuh chhuah thar mi 75 an awm a; thisen sang hriat tawh sa 199 leh zunthlum nei tawh ṭhin 106 endik nawn a ni bawk.