KHAWTHLIR

Thisen pe

Nimin khan KM Higher Secondary School NSS-te'n an sikulah Civil Hospital, Aizawl tan thisen unit 42 an pe a, petute mipa 28 leh hmeichhia 14 an ni. KṬP, Saikhamakawn Branch pawhin an branch golden jubilee pualin Synod Hospital tan thisen unit 27 an pe a, petute mipa 25 leh hmeichhia pahnih an ni.

Tlan phal lohna

Aizawl Traffic SP Stephen Lalrinawma chuan hriattirna chhuahin, Sikulpuikawn leh Khatla kâwnah lirthei veivâk tam zual laia traffic jam a ziaawm theih nan December 6, 2024 aṭangin zing dar 9-10 inkarah Khatla, Peter Street aṭangin Tennis Court lamah Aizawl City Bus tih loh lirthei dang tlan phal loh a nih thu a tarlang. Hriattirna hian sorkar chawlh a huam lo thung.

World AIDS Day

Khawzawl District Hospital meeting hall-ah nimin khan Mizoram State AIDS Control Society leh District AIDS Prevention and Control Committee chuan World AIDS Day pualin hun an hmang. He hun hi district bawrhsap K Vanlalṭhiana, DAPCC Chairman ni bawkin a hmanpui a, HIV/AIDS chungchang zirho a ni.

Kawng ro hun nghak

Venghnuai Presbyterian Kohhran biak-in aṭanga Venghnuai khelmual inkar kawng thawm ṭhat hna (RCC pavement) thawh mek chu kawng ro ṭhat hun (curing period) nghah a la ngaih avangin Traffic SP Stephen Lalrinawma chuan December 7, 2024 thleng khâr a nih dawn thu a tarlang.

MUP Favang Meet

Kanghmun bial chhunga Mizoram Upa Pawl (MUP)-te chuan nimin khan Kanghmun Community Hall-ah Favang Meet an hmang a, Assembly speaker Lalbiakzama'n a hmanpui. Speaker chuan, "Kum upate aṭangin ṭhalai zawkte'n kawng engkimah zir tur kan nei," a ti a, khawtlang, kohhran leh ram inrelbawlnate an finnaa châwm tur leh uap tlat turin MUP member-te a chah.

SP-in fimkhur turin a chah

Hnahthial SP Shivam Siddharth chuan December 9-13, 2024 chhunga No Tolerance Week kalpui tur chungchangah thuchhuah a siam a; lirthei khalhtute chu dan zâwm a, fimkhur taka lirthei khalh tur leh lirthei document felfai tak nei turin a chah. Hnahthial SP chuan, "No Tolerance Week-ah hian Hnahthial police-te'n driving license nei lo leh insurance certificate nung loa lirthei khalh, mipui leh bungraw phur lirthei fitness certificate nei lote leh lirthei kaihhnawih dan bawhchhiatna hrang hrang avanga vanduaina thleng thei venna atan uluk takin checking an nei ṭhin dawn a ni," a ti.