LADC-ah MNF leh BJP-in sorkar an inring Congress-in sorkara tel ngei an tum bawk
December 4, naktuka Lai Autonomous District Council (LADC) MDC inthlanpui neih turah BJP leh MNF chuan party mala sorkar theih ngei an inring a, Congress party chuan sorkara tel ngei an tum thung.
Vanglaini palai chuan LADC inthlan lo awm tura candidate nei party pathum - BJP, MNF leh Congress party hruaitute a be kual a, an dinhmun tura an ngaihdan a zâwt. State-a sorkar lai MNF party vice president Vanlalzawma chuan, party mala sorkarna siam theih ngei an inbeisei thu sawiin, "Pathian leh mipui zarah sorkarna kan siam ngei kan inring," a ti.
Vanlalzawma sawi danin, LADC inthlan turah hian an party boruak a ṭha a, bial ṭhenkhatah chuan Congress mi leh sate'n an party candidate an vote dawn a ni. MPCC (Congress party) treasurer Zodintluanga Ralte chuan, an party mal chuan sorkarna an siam theih a rin loh thu sawiin, "Kan CEM leh EM-te'n BJP-ah min chhuahsan a, chuvangin, keini tan chuan a mala sorkar a harsa ang," a ti.
Sorkarah erawh chuan tel ngei an inrin thu sawiin Zodintluanga chuan, "Party malin sorkarna siam thei an awm kan ring lo a, chuvangin, dinhmun pawimawh tak kan luah ang," a ti a; an puihna tel lo chuan sorkarna siam thei an awm a rin loh thu a sawi.
BJP vice president LR Colney chuan, party mala sorkarna an siam theih ngei an inbeisei thu sawiin, "Party mala sorkarna kan siam thei lo a nih pawhin sorkarah chuan kan tel ngei ang. Kan tel lo chuan sorkarna siam thei an awm kan ring lo," a ti. Seat zawng zawng an chuh loh chhan zawhna chhangin LR Colney chuan, "Tuna candidate kan dahna chu mi ṭha leh kan party ṭhatna hmun tura kan ngaihte an ni," a ti a; an ṭhatna sa bak huang an zauh vak rih loh thu a sawi. LADC-ah hian MDC seat 25 a awm a, MNF-in seat 25, BJP-in seat 17 leh INC-in seat 14 an chuh dawn. Independent candidate 18 an awm a, chu'ng zinga pathum chu INC thláwptu an ni.