SRS & CID tangkawpin Ni 4 chhungin nuai 326 man Meth man

Central YMA hnuaia Supply Reduction Service (SRS) leh CID (Crime) Special Narcotic staff-te chuan tun hnaiah hmun hrang hrangah Meth tam tham tak an man a; SRS leh CID (Crime)-te'n ni li chhunga Meth an man hi mûm 1,08,800 a ni a, local market-ah Rs. 3,26,40,000 man anga chhût a ni.

June 1, 2015 zan dar 10:45 khan Zemabawk Forest Check Gate-ah Methamphetamine (Meth) mûm 50,000, cheng nuai 150 hû an man a; a neitu mi pahnih leh an thurualpui mi pahnih an man bawk.

Meth neitua puhte hi Thangdailova (32) s/o Thanliana (L), Kanan, Tamu, Myanmar leh Lalthankhuma (31) s/o Saitawna, Tamu, Myanmar nia inchhalte an ni a; an thurualpuite chu Lalropuia (54) s/o Rinchungnunga, New Champhai leh Lalremthanga (54) s/o Chhunthiauva, Zokhawsang, Zemabawk nia inchhalte an ni.

Central YMA SRS, CID (Crime) Special Narcotic leh YMA Sub-Headquarters, Kolasib-te ṭangkawp chuan May 29, 2015 tlai dar 3:30 vel khan VZ Kapmawia in, Thingdawl Hmarveng aṭangin Meth mûm 58,800 an lo man tawh bawk a; chu chu local market rate-a chhûtin Rs. 1,76,64,000 man a ni. Meth neitu nia inchhál Samuel TT Thanga, Kolasib College Veng an man tel bawk.

SRS leh CID (Crime)-te'n ni li chhunga Meth an man hi mûm 1,08,800 a ni a, mizoram chhunga an hralhna (local market) anga chhûtin Rs. 3,26,40,000 man a tling.

SRS secretary RL Zomawia chuan Vanglaini palai zawhna chhangin, Mizoramah Meth tam tham tak man ni tawh mah se a la darh tam lutuk loa a lan thu leh, Meth ti/khawih pawh an la tam lutuk loa an hriat thu a sawi a; Meth an mante chu Mizorama chámbáng tâwk awm thei mah se, Bangladesh leh India ram hmun danga kal zel turte a nih a rinawm thu a sawi.

Mizorama Meth a la hluar lutuk loh chhan nia an hriat dan zawhna chhangin, SRS secretary chuan, "Awareness a awm ṭha hmasa a, Mizo ṭhalaite hian an hlau a ni mai thei a, Mizo ruih duh chi a ni vak lote a ni thei bawk," a ti.