Bru enfiah tur inlan lo

Tripura transit camp-a Bru-te Mizorama lak letna tura enfiah hna chu nimin khan Kaskau camp-ah ṭan a ni a, mahse nimin tlai dar 4 thleng khan enfiahna hmuna kal an awm lo.

Mizoram sorkar official-te chu nimin chawhma dar 11 khan Kaskau camp-ah an hruaitute nen an inkâwm a; inkawm zawhah Mamit SDC Victor Lalawmpuia leh Kolasib SDC Lalhmingliana leh an thawhpuite'n Mizorama let duh, Mizoram mi an ni tih enfiah turin an nghak a, mahse kal an awm lo a ni.

Sorkar official-te chuan, nimin khan Damcherra bazar ní a nih avangin kal hman an awm lo nia an rin thu an sawi. Tlai dar 4 thlenga an nghah hnuah nimin bik atan enfiah hun chu an khâr a; vawiinah inenfiahna office chu hawn chhunzawm leh a ni ang.

Bru-te enfiahna turah hian Tripura sorkar aṭangin Panisagar sub-divisional magistrate Diplab Das leh Damcherra Police Station-a officer in-charge Swapan Deb Barman te pawh an tel a ni.

Hetih lai hian, Mizoram Bru Displaced People Forum, Kaskau camp branch president Shadumonoy chuan, Kaskau camp-a Mizoram mi Bru-te chu Mizoramah kîr an tum niin a sawi a; nimina anmahni enfiahtu turte hnena an kal loh chhan chu Damcherra bazar ní a nih vang niin a sawi bawk.