KHAWTHLIR
Champion lawmpui
Mizoram State Sports Council chuan tun hnaia National Sub Junior Girls Football Championship, Odiha-a neih zawh taka champion Mizoram team lawmpuina hun nimin khan MSSC office-ah an hmang a, Dr K Beichhua, MLA-in a hmanpui. Dr K Beichhua chuan sports-ah ruling leh eptu a awm theih loh a, an zavaiin an ṭangho vek niin a sawi.
Swachh Bharat
Nimin khan Aizawl DC Conference Hall Aizawl District Swachh Bharat Mission meeting neih a ni a, PHE superintending engineer C Lallunghnema'n a kaihruai. Meeting-ah hian MLA-te pawh an tel a; Swachh Bharat Mission hnuaia hmalakna turte an sawiho a ni.
Khatla lawm
Khatla Local Council chuan thuchhuah siamin, Khatla leh veng dang ṭhenkhata mi in rawka thil ru ṭhin, Lalhmingliana, Chite Veng nia insawi leh a thil rukte chenpuitu Lallawmzuali-te man an ni chu lawmawm an tih thu an tarlang a; Lalhmingliana chu a phu tawka hrem ngei an phût thu leh, Khatla Veng rap tawh lo tura an duh thu an puang bawk.
Mock drill nei
Disaster Management & Rehabilitation department leh Serchhip District Disaster Management Authority-te chuan nimin khan Serchhip High School naupangte nen chhiatrupna thlen thulha chêt lak dan tur a taka zirna, mock drill an nei.
NITI Aayog palai
Faina beihpui thlakna, Swatchh Bharat hnuaia Mizorama hna thawh dan endik turin nimin khan NITI Aayog adviser BK Pandey leh member dang pahnihte Aizawlah an rawn thleng.