Kolkata-a Mizo hmeichhe pahnih man leh Passport lem siama puhte chhui zui a ni

Kolkata airport-a tun hnaia Mizo hmeichhe pahnih passport fel lo vanga man an nih chungchang chu Mizoram police-te'n an chhui zui a; nula pahnihte passport lem siaksaktua puh Global Talents Agency, Aizawl neitute chu police-te'n thu an zawtfiah tawh.

Tarlan tawh angin, Lalrinfeli (21) d/o Zoramchhana (L) Seling chu May 28, 2015 khan Kolkata aṭanga Singapore pan a tum laiin Netaji Subash Chandra Bose International Airport, Kolkata-ah man a ni a; Nuzawni (kum 30 vel) d/o Lalthari, Mamit Chhimveng pawh a hma lawkin Kolkata Airport-ah tho man a ni. An pahnih hian Barrackpore Jail-ah dah an ni.

Lalrinfeli leh Nuzawni-te Singapore an kal theihna tura passport dik lo siamsaktua puh, Global Talents Agency chu Mizoram police-te'n an chhui zui nghal. Police hotute hnen aṭanga thu dawn danin, Global Talents Agency hi Bazar Bungkawn bul hnaia awm a ni a, a enkawltute chu Rosie Lalnunsangi, Dawrpui leh Henry Lalnuntluanga, Zotlang, Aizawl te an ni.

Global Talents Agency lakah hian Mizo Ṭhalai Pawl invuahte chuan nimin khan Aizawl Police Station-ah FIR an thehlut a; Aizawl PS lam pawhin chhui zuiin, Rosie Lalnunsangi leh Henry Lalnuntluanga te chu thu an zawtfiah tawh a, a ṭul angin thu an la zawtfiah leh ang.

Police hotute chuan, Lalrinfeli leh Nuzawni te case chu West Bengal police-te'n an chhui zui reng a, Mizoramah pawh an rawn chhui thlen a rinawm thu an sawi a; Global Talents Agency-in passport an pek chhuah chu passport lem ni loin, mi dang passport an hmantir niin an sawi bawk.

Lalrinfeli leh Nuzawni te hi bail an nih theih nan Calcutta Mizo Welfare Association (CMWA) leh Kolkata Mizo Students (KMS) hruaitute'n ṭan an la chhunzawm zel a; Nuzawni zawk chu June 1, 2015 tlai khan an bail chhuak thei a, Lalrinfeli pawh bail tumin hma an la mek.

KMS general secretary Lalruatfela Ralte-in Vanglaini a hrilh danin, bail-a chhuak tâk Nuzawni chu June 10, 2015-ah Court-a inlan leh tura tih a ni a; a duh chuan Mizoramah pawh a haw thei a, mahse June 10-ah Court-ah a inlan ngei a ngai thung.

Lalrinfeli bail turin CMWA leh KMS hruaitute'n hma an la mek a, bail hearing hun atan June 12, 2015 ruat an tawh a; ukil rawih tur an zawng mek a, an duh ang an hmuh hma dan azirin bail hearing hi sawn hma theih an beisei. Lalruatfela Ralte chuan, thubuai chu Aizawla ngaihtuah tura sawn an dil mek tih a sawi bawk.