Truck pakuaa gas tichingpen lai man
Legal Metrology department chuan Mualkhang bulah truck pakua chhunga eirawngbawlna gas khawih chingpen lai an man a, truck leh document bakah, an gas phurhte an hrêng rih.
May 30, 2015 zan aṭang khan Mualkhang bulah kawng sirah truck pasarih chhunga gas khawih chingpen hmuh a ni a, a tûkah truck pahnih chhunga khawih chingpen nen a vaiin truck pakua chu an hrêng ta a ni.
Nimin khan Legal Metrology deputy controller K Rochhuma hoin inspector-te leh enforcement staff-te'n a hmunah an enfiah a; driver-te chuan gas bûr an hralh rûk hnawhkhah nan gas bûr tam tak aṭangin bûr ruakah an thun chhawng ṭhin a, gas bûr ruak paruk thun khah nan bûr 60 aṭangin tlem tlem an la chhuak ṭhin tih an hmuchhuak a ni.
Gas khawih chingpenna truck an mante chu - AS-01 C-5195; AS-11 AC-5686; AS-11 A-4840; AS-11 A-6697; NL-04 D-3661; MZ-05 2250; MZ-01 E-7020; MZ-05 5153 leh NL-08-A-5146 te a ni.