June 11-ah Green Mizoram Day
State Level Committee on Green Mizoram chu nimin khan an chairman Lal Thanhawla, chief minister kaihhruaiin CMO Conference Hall-ah an ṭhukhawm a; Green Mizoram Day 2015 hman hun atan June 11 an thlang.
Chief Minister chuan, Green Mizoram Day-a thing ṭiak phunte a puitlin ngeina turin enkawlzui a pawimawh tih sawiin, "Mi inthlahdahte vang te, lo hâl vang leh roadside reserve-te kan ngaih pawimawh tâwk ṭhin loh avangin kângmeiin a tichhe ṭhin hi a pawi thei hle a ni," a ti a; chutih rualin, mi tam zawkin thing leh mau humhalh nachang an hre ta chu lawmawm a tih thu a sawi.
Meeting chuan Green Mizoram Day hman ni atan June 11 an thlan bakah, thupui atan ‘I dam khawchhuah nan thing phun rawh’ tih an thlang. A hmanna pui ber chu Hmuifang Tourist Complex-ah neih a ni ang a; district headquarters tinah hmang tura tih a ni bawk.
Meeting chuan, thing phunte an dam khawchhuah ngei theih nan sorkar department-te bakah, a phunna ram neitute che ber tura hman thiam ni se, an ti a; thing ṭiak phun tur chu a leilung leh sik leh sa ngeih tur chi Environment & Forest department-in thlang se, an ti.
Meeting-a tarlan danin, Green Mizoram Day hi kum 1998-ah hman ṭan niin, kum tin hman a ni a, kum 1999-2014 chhungin thing ṭiak 36,06,302 phun tawh a ni.