Champhai dist-a Green Park tur thlang

Green India Mission (GIM) hnuaia Champhai District Level Steering Committee chu nimin khan an chairman H Lalengmawia, Champhai DC hoin DC Conference Hall-ah an ṭhukhawm a; Champhai district-a Green Park siamna tur hmun pathum an thlang.

GIM-in a phût anga Champhaia Green Park siamna tura thlan hmun pathumte chu - Zotlanga park humhalh mek te, Zote rama Vailung Thlar Tlang leh North Khawbung bula Bungte Tlang a ni.

H Lalengmawia chuan, Green Park siam chu sorkar laipui aṭanga district tinah leh sub-division ahte siam tura ruahman a nih angin bawhzui a nih thu leh, district tina Green Park siam zat tur erawh bithliah a awm loh thu a sawi.

GIM Champhai District Level Steering Committee chuan Green Park atan an thlan hmun pathumte zau zawng teh chhuak turin Environment & Forest department an ruat a, vawiinah teh ṭan a ni ang.