NLUP hnuah tlang ram lo neia eizawng 66.44% aṭangin 46.14%-ah a tlahniam

Consultative Com­mittee for NLUP-in NLUP hnuaia serthlum chîngte dinhmun an zirchianna report, 'Study on the success and impact of NLUP under Horticulture sector in Mizoram: Mandarin Orange' tih chu nimin khan chief minister Lal Thanhawla’n NLUP Implementing Board (NIB) conference hall-ah a tlangzarh. Report chuan, NLUP kalpui hnuah Mizorama tlangram lo neia eizawng zat chu 66.44% aṭangin 46.14%-ah a tlahniam niin a tarlang.

Sorkar thuchhuah tarlan danin, serthlum chu NLUP hnuaia leilung behchhan eizawnnaah ṭanpuina dawngtu tamna ber a ni a, research neihna atan rintlaka ngaih a nih avangin Mizorama district pariata khaw 35-ah zirchianna neih a ni a; Horticulture hnuaia serthlum thlangtu mi 8,538 zinga 6,565-te dinhmun aṭangin report siam a ni.

Report-a a lan danin, NLUP kalpui hnuah Mizoram chhungkua zinga tlang ram lo neia eizawng 66.44% chu 46.14%-ah a tlahniam a, chhungkaw pakhatin lo an vahna hmun pawh 22.52% zelin a tlahniam. Tlang ram lo neia thawktu zat chu 47.69% aṭangin 29.54%-ah a tlahniam a ni.

Leilet neia eizawng chu 16.19% aṭangin 27.20%-ah a pung chho thung a; leileta thawktu zat pawh 18.17% aṭangin 31.14%-ah a pung ve bawk.

NLUP-a serthlum thlangtu zingah bank account nei 46.81% aṭangin 98.24%-ah a pung a, serthlum phun zawng zawng zinga 68.35% chu a nung ṭha a, puitling thei tura ngaih a ni. NLUP hnuaia serthlum chînna hmunin ram hectare 3,100 a khuh a; kum 2017-ah Mizoram serthlum thar chhuah chu metric ton 1,095-in a pung tura chhut a ni.

Chief Minister chuan, Consultative Committee for NLUP-in hun rei lote chhunga report belhchian dâwl tak an buatsaih chu lawmawm a tih thu sawiin, "Heta ṭang hian NLUP enkawltute tan tih tur tam tak a lang a ni," a ti a; kut hnathawktu tan pawh phûrna petu a nih a beisei thu a sawi.

Hawla chuan, NLUP line department zingah pawimawh lo a awm lo tih sawiin, ṭanpuina dawngtute kaihhruai leh enkawl kawngah line department zawng zawngte chu inphûr chhuah turin a chah a; ṭhahnemngai taka NLUP hlawhtlin nana thawk zel turin a fuih bawk.