Mizoram chhungah Covid-19 vei Mi 1,527 enkawl theihna a awm

Meeting-a tarlan danin, CCC chu doctor leh nurse-te'n an awmchilh reng ṭhin avang leh sorkarin inkaihhruaina mumal tak a duan avangin mipuite tan ngaihṭhat lohna tur a awm lo a; CCC atana ruat tawh, a hmunhma chei ṭhat la ngaite chu rang taka tihfel a nih theih nan ruahmanna siam a ni. Quarantine centre atana hman mek ṭhenkhatte CCC atana thlak dan tur an sawiho bawk.

Tun dinhmunah Aizawl district tih loh chu ngaihtuahawm lutuk loin lang mah se, CCC atana hman tur dap zui zel a pawimawh thu meeting-ah hian tarlan a ni a; Aizawl district, a bik takin Aizawl leh a chhehvel hnaivaiah CCC tur ngaihtuah belh a ṭul hlea hriat niin, a tlem berah mi 2,500 vel tal vawi khata enkawl theihna tur CCC ngaihtuah a ṭula ngaih a ni.

CCC atana hmun remchang tur deuha ngaihte chu a rang lama enfiah turin an rêl a, sorkar in an chhinchhiah lâwkte chu department thlan bika official-te bakah building awmna hmun village/local task force-te nen enho ṭhin ni se, an ti.

Kohhran ṭhenkhat leh YMA branch ṭhenkhatin an hmun­hmate CCC atan hman an phal thute hriat a nih tawh thu sawi a ni; chu'ngte chu mipui tan a him leh him loh endika finfiah turin sorkar mi ruatte bakah, a hmunhma neitu kohhran, YMA-te nen enho zel ni se, an ti bawk.

Ṭhutkhawmah hian Medi­cal Operational Team on Covid-19 chairman Dr ZR Thiam­sanga, MLA, chief secretary Lalnunmawia Chuaungo, Home secretary Lalbiaksangi, Health secretary H Lalengmawia leh official dangte an tel a ni.

Aizawl    16    847

Lunglei    3    57

Siaha    1    20

Champhai    1    34

Kolasib    2    222

Serchhip    3    154

Lawngtlai    2    90

Mamit    2    80

Saitual    1    5

Khawzawl    1    6

Hnahthial    1    12