Covid-19 veite damdawi-in aṭanga chhuahtir dan tur siam a ni dawn

Health minister Dr R Lalthangliana hoin thiamna bik nei doctor-te'n ningani tlai khan Mizorama Covid-19 veite dinhmun an sawiho a, Mizoram bika damdawi-in aṭanga Covid-19 veite chhuahtir dan tur kaihhruaina neih an rêl.

Meeting-ah hian, khawvel hmun hrang hranga zir chiannaa Covid-19 hrik hnathawh dan sawiho a ni a; Covid-19 chu natna thar a nih avangin, a nihphung hriat a har thu leh, ngaihdan nghet tak siam a harsat ṭhin thu sawi a ni.

Covid-19 vei enkawlte damdawi-in aṭanga chhuahtir dan turah ngaihdan thawh khawm a ni a; Mizoram bika hman tur discharged policy mumal tak neih ṭha an ti a, a ngaihtuah tur committee an din nghal. Committee hi naktukah an ṭhukhawm nghal ang.

Committee din thar hian khawvel hmun hrang hranga Covid-19 veite an enkawl dan kalphung an zir bakah, Mizorama Covid-19 veite nihphung an zir chiang ang a, Mizoram tana him thei ang ber turin ruahmanna an siam dawn niin sorkar thuchhuah chuan a tarlang.

Covid-19 discharge policy ngaihtuah­tu tur committee-ah hian public health professional, microbiologist, physician, university professor-te leh thiamna bik nei dangte an tel a ni.