Covid-19 vei hmuh thar 20 zingah LC inthlana duty pakhat a tel

September 10, Ningania Mizorama Covid-19 vei hmuh chhuah mi 20 zinga mi 12 chu Mizorama kái chhâwng (local positive contact) an nia hriat a ni a, an zingah local council inthlana duty pakhat a tel. Kaina àwm la hriat chian theih loh an awm nual bawk.

Sorkar thuchhuah tarlan danin, ZMC-a mi 310-te swab sample endik aṭanga Covid-19 vei hmuh chhuah thar 16-te chu mipa 10 leh hmeichhia paruk, civil mi vek an ni a, Mizoram chhunga kái chhâwng veka ngaih niin, nausên thla 6 mi leh thla 10 an tel.

Local positive contact-te awmna veng tarlan LTF hruaitute Vanglaini palaiin a biak kualnaah, local positive contact zat hi sorkar tarlan aiin a tam zawk a, an kaina chhan awm hriat chian theih loh pawh sorkar tarlan aiin a tam zawk.

Nursery Venga hripui vei hmuh chhuah thar pakhat chu local council inthlana duty, vote chhiartu a ni a, mi tam takin an kai ṭannaa ngaih - August 24, 2020-a training-naa tel ve a ni. Ani hi ama sum sênga inendiktir a ni.

Zotlang venga Covid-19 vei hmuh chhuah thar mi pahnih mipa leh hmeichhiate chu an kai chhan hriat a ni lo a; rinhlelh vang ni lo, LTF member ve ve an nih avanga swam sample laka endik an ni a, mipa zawk chu LC inthlana candidate zinga mi niin, hmeichhia chu health worker, Zotlang Sub-Centre-a thawk a ni.