Office hun vawng dik lo 338 Casual Leave paihsak an ni

General Administration Department (GAD) chuan March 3, 2015 khan Office Memorandum chhuah tharin, sorkar department tinte chu an office-ah surprise check neia pisa thlen huna thleng lote enfiah turin a hriattir. GAD Office Memorandum bawhzuinaah March-May 2015 chhung khan mi 336-te casual leave ni chanve paihsak an ni a, mi dang pahnihte casual leave ni khat paihsak an ni.

GAD Office Memorandum (OM) chuan, sorkar hnathawkte zingah pisa hun (office hour) ngai pawimawh lo leh zâwm ṭha lo an tam thu tarlangin, "Hun rei tawh tak aṭangin sorkar officer leh thawktu dang zingah office timing ngai pawimawh lo tam tak an awm reng a, hei hi sorkarin a ngaimawh a ni," a ti a; Chief Secretary hoa sorkar hotu lute meeting-ah sorkara secretary leh department hotu lute chu entawntlaka awm tura beisei an nih thu a tarlang.

GAD OM tarlan danin, office attendance register chu pisa ṭan hun aṭanga minute 30 chhungin office-a hotu ber hnenah pek luh tawh tur a ni a; office-a controling officer-in thawktute office hour chhungin an awmna turah an awm leh awm loh a enfiah fo tur a ni.

Office tinah chawlhkar khatah vawi hnih tal, nipui lai chuan zing dar 9:00 - 9:30 inkarah surprise check neih tur a ni a, office ṭan huna office-a thleng hman leh hman lote chhinchhiah tur a ni.

Chhan ṭha tak awm si loa pisa kal tlaite chu an vawi khat kal tlainaah casual leave ni chanve (half day) paihsak tur a ni a, a hnu lamah chuan an tlai apiangin casual leave paihsak tur niin, casual leave-in a daih loh chinah earned leave paihsak leh tur a ni.

Surprise check hi Secretariat bikah chuan GAD-in an kalpui a, a titu tur bik atan superintendent leh under secretary mi 11 ruat an ni. Department-ah chuan head of department/office emaw, surprise check ti tura ruat officer-in emaw surprise check an ti tur a ni a; kar tâwp apiangin GAD-ah report thehluh tur a ni.

GAD aṭanga thu dawn danin, OM chhuah thar leh a nih hnuah GAD-in ṭum eng emaw zat surprise check an nei tawh a, department/directorate 10-in surprise check an tihna report GAD-ah an thehlut tawh. GAD-a surprise check tihna report thehlut tawh zingah - School Education, UD&PA, PHE, Horticulture, Agriculture directorate pahnih, ICT, Art & Culture, SAD leh GAD Aviation Wing-te an tel.

March-May 2015 inkara surprise check an tihnaa pisa kal tlai an hmuhchhuah aṭangin mi 366-te chu an casual leave ni chanve paihsak an ni tawh a; casual leave paihsak hi mi pakhat vawi khat aia tam paihsakte pawh an awm avangin mihring 366 tihna ni loin, casual leave paihsak tawh zat tihna a nih thu GAD hotute chuan an sawi. Casual leave ni khat tawp paihsak mi pahnih an awm tawh bawk.

GAD under secretary Margareth Lalrinawmi Fanai chuan, surprise check tih hnuah office hun an vawng dik sawt tih sawiin, Secretariat bikah chuan departmnent 30-ah hmasawnna a awm tih Vanglaini a hrilh a; surprise check chu tih reng tur a nih thu a sawi.