YMA Day-ah tanpui hna uar turin CYMA-in member-te chah

Central YMA chuan June 15, 2015-a lo thleng tur YMA Day vawi 80-na thuchah nimin khan an tichhuak a; YMA branch leh member-te chu damlo mangangte thisen pe turin an ngen a, veng chhung thenfai hnatlang nei turin a chah bawk.

CYMA chuan, YMA Day chu Mizoram sorkarin pisa chawlha a puan avangin sorkar chungah an lawm thu a tarlang a, "Sorkarin pisa chawlha a puan remchanga hmanga pawl leh kohhrante'n programme dang siam lo a, he ni hi mi dangte tana inpekna nía hmang ṭheuh tur leh khua leh veng chhung tana ṭangkai taka hmang ṭheuh turin pawl leh mi tin kan ngen a. YMA branch-te leh mimal tinte chu ram leh hnam tan chhenfâkawm, mimal tana nun kawng dik inzirtirna hun atan hmang ṭheuh turin kan inbeisei a ni," a ti.

CYMA YMA Day thuchah

1. YMA Day 2015 thupui atan ‘Ram leh hnam humhalh’ hman ni se, kan khawtlang ṭheuha a chhe lai leh siam ṭhat ngaite siam ṭha turin hmalak ni se.

2. YMA hi ṭanpui ngaite ṭanpui tura pawl din a nih angin, veng chhunga mi harsa leh chhumchhiate dap chhuak a, a theih ang anga ṭanpuina hlan ni se. YMA branch tinah chenna in thawm ṭhat ngai leh chhuanchham mai turte dap chhuak a, a theih leh remchan anga chhawmdawl turin kan ngen a, mite harsatna sutkiansakna ní leh mangangte ṭan­puina ní atan hman ni se.

3. Damlo mangang ṭanpui ngaite thisen pe turin YMA branch leh mimal tinte kan inngen a, faina leh thianghlimna hi YMA-te'n kalphung ngheta kan neih tlat tawh angin, he ni denchhen hian veng chhung thenfai hnatlang neih ni se.

4. YMA branch-te'n a remchan dan azirin hospital/home/centre-ahte ṭanpuina thilpek hlan ni se. YMA in, library, lungphun, sign­board leh thil dangte tuaithar leh ni se. Khawlai remchang leh YMA hall-te YMA rawng (flag rawng)-a chei uar ni se, YMA flag pawh langsar taka tarlan ni se.

5. YMA kum 80-na hi hlim tak leh uar taka hmang turin Mizo mipui duhsakna kan hlan e.