Bru inenfiahtir duh an awm lo zel

Mizoram Bru, Tripura Transit Camp-a awm mekte lak letna tura kaskau camp-a endik hna thawh mekah niminah pawh khan Bru-te zingah inenfiahtir an awm lo.

Bru-te hi June 2-ah pawh khan endik tum an lo ni tawh a, mahse enfiah tura kal an awm lo a ni. Mizoram Bru Displaced People Forum Kaskau camp branch president Shadumony chuan, Bru-te chuan nimin khan anmahni endiktu tur Mamit SDC Victor Lalawmpuia leh Kolasib SDC Lalhmingliana te hnenah lehkha an thehlut a; an thil phût hrang hrangte tihhlawhtlin a nih loh chuan Mizorama kîr harsa an tih thu an sawi.

Bru-te thil phûtte chu - in sakna tur ram leh chhungkaw tin eizawnna tur ram pek te; khaw lian deuhah in 500 aia tlem loa dah khawm te; ṭanpuina Rs. 1,50,000 pek te; pri­mitive tribal group-a telh te; a bika enkawlna pek leh venhimna ṭha tâwk pekte a ni.