Covid-19 vei 20 hmuh belh

September 10, Ningani khan Mizoramah Covid-19 vei mi 20 hmuh chhuah a ni a, nimin khan mi 40 chhuahtir an ni thung. Mizorama hripui kai hmuh tawh zat chu mi 1,353 an ni.

Mizorama Covid-19 vei hmuh chhuah tawh mi 1,353-te chu mipa 1,122 leh hmeichhia 231 an ni a; mi 790 (58.39%) chu dam taka chhuahtir tawh niin, la chhuak lo mi 563 (41.61%) an awm. La chhuak lo zingah hripui vei tawh lo an awm nual bawk.

Ningania hripui vei hmuh chhuahte chu mipa leh hmeichhia 10 ve ve an ni a, mi 16 chu ZMC laboratory-a hmuh chhuah an ni. Lunglei Civil Hospital-ah BSF sipai pakhat hmuh chhuah niin, Assam aṭanga lo lut quarantine centre-a awm mek a ni a; Rapid Antigen Test (RAT) hmangin Vairengte checkgate-ah hnam dang driver/handyman pali hmuh chhuah a ni.

Nimin khan hripui vei dam tawh mi 40  chhuahtir an ni a; Zokhawsang CCC aṭangin mi 18, Tribal Art Centre, Tanhril CCC aṭangin 18, SRH-ZMC, Lunglei Pukpui CCC, Serchhip DCHC leh Siaha DCHC aṭangin pakhat ṭheuh an chhuak a ni.