KHAWTHLIR

Thisen pe
Phunchawng Branch KṬP chuan Central KṬP blood donation calendar angin nimin khan an kohhran hall-ah blood donation camp an huaihawt a, an member mipate'n Synod Hospital tan thisen unit 12 an pe.

Rifle leh a mû man
Mizoram police-te chuan June 2, 2015 zan khan Dinthar, Aizawla in pakhatah Myanmar aṭanga an mikhual bungraw ken zingah AK-47 rifle pakhat leh a mu 40 an man a, silai neitu GK Khupa (38) s/o Thangchinhang, Tiddim, Myanmar nia insawi chu an man bawk.

MJA Library pe
H Laldinmawia chuan a lehkhabu ziah, ‘Literature Lamtluang’ tih chu MJA Public Library-a dah turin bu hnih a pe a, a chungah MJA chuan lawmthu a sawi.

Hall hawng
Saiha 'Multipurpose Community Hall' sak thar chu nimin khan MADC chief executive member RT Zachono-a'n a hawng. Hall hi BRGF sum cheng nuai 190 sênga sak a ni.

Thu zawtfiah
Kau-Tlabung leh Tuipanglui mini hydel project thubuai kal zelah Anti Corruption Bureau chuan nimin khan FIR thehluttu PRISM president Vanlalruata leh general secretary RL Liantluanga-te chu thu an zawtfiah.

Boxing training
Mizoram Boxing Association (MIZBA)-in Serchhipa AH&Vety rest House-a thla thum awh boxing zirna, boxing training an buatsaih tur chu nimin khan MIZBA president Dr Zorammawia'n a hawng. Serchhip Boxing Training Centre hi Serchhip District Boxing Association-in an enkawl ang.

Lirthei 68 man
Aizawl Municipal Council hotute leh Traffic police-te chuan Thawhlehni zan khan hlawm li-ah inṭhenin, Aizawla kawngpui sira dan kalha lirthei dah leh riahte an enfiah leh a, phal lohna hmuna lirthei dah 68 an man. Thawhṭanni zan khan lirthei 71 an lo man tawh a ni.

Biometric thlirho
Nimin khan Champhai DC conference hall-ah Champhai district-a biometric enrolment kalpui meka an thlen chin leh hmalak zel dan tur ngaituahin DC H Lalengmawia hoin mi pawimawhte an ṭhukhawm. Meeting-ah hian Champhai district-ah 38.74%-in biometric enrolment an tih tawh thu tarlan a ni.

Tlabung lawm
MZP sub-headquarters, Tlabung chuan thuchhuah siamin, hun rei tak chhung Tlabungin SDO (Civil) an neih loh hnua MZP leh khawtlang mipuite ngenna ngai pawimawha sorkarin SDO (Civil) thar atana Rolungmuana, MCS a dah ta chu lawmawm an tih thu an tarlang.