Kum 2014-a Central Library tlawhtu mi 6,608

Mizoram State Central Library chuan kum 2014 chhung khan tlawhtu 6,608 an nei a, kuminah January-April chhungin tlawhtu mi 1,843 an nei.

State Central Library hi kum 2011-ah tuna anmahni building, New Secretariat Complex-ah sawn a ni a, a awmna hmun sawn a nih hnuah tlawhtu an tlahniam hle a, tun hnaiah zawi zawiin an pung leh ṭan.

State Central Library-a assistant librarian Zirsangzuali'n Vanglaini palai zawhna chhanga a sawi danin, May 2015 tawp thleng khan Central Library-ah hian lehkhabu 58,452 a awm a; hun bi neia chhuak chanchinbu (magazine) Mizo 16 leh English pakua an la a, ni tin chanchinbu (newspaper) Mizo 12 leh English paruk an la bawk.

Central Library hian New Secretariat Complex-a an building thara an insawn hma chiah kum, 2010-ah tlawhtu mi 10,628 a nei a; kum 2011-ah an building tharah insawnin, chumi kum chuan tlawhtu mi 3,620 an nei a, 65.94%-in tlawhtu an tlahniam nghal a ni.

State Central Library tlawhtu hi kum 2011-a a tlakhniam vak hnuah kum tin an pung leh tial tial a, hawpui lailia an awm laia tlawhtu zat erawh a la pha lo hle. Tun hnai kum nga chhunga tlawhtu zat chu - kum 2010-ah mi 10,628, kum 2011-ah mi 3,620, kum 2012-ah mi 3,983, kum 2013-ah mi 4,008 leh kum 2014-ah mi 6,608 an ni a; kumin 2015 bikah January aṭanga April thla tawp thlengin mi 1,843-in an tlawh bawk.

Assistant librarian sawi danin, State Central Library tlawhtu an tlakhniam chhan pui ber chu a awmna hmunin a zir loh vang a nih thu leh, khawpui laili deuha an awm lai chuan tlawhtu an ṭha a; hei bakah hian Mizote zingah lehkha chhiar peih an tlem tak avangin tlawhtu an tlahniama an ngaih bawk thu Vanglaini palai a hrilh.

Zirsangzuali chuan, tun hnaia State Central Library tlawhtu tam ber chu naupang an ni a, naupangah pawh New Secretariat Complex leh a bul hnaia awm Bungkawn Vengthar naupang an tam thu a sawi a, "Sikul anga rawn tlawhtu an awm zeuh zeuh bawk," a ti.

Tun dinhmunah thawktu nghet mi 12 leh a nghet lo mi pathum an awm a, Mizoram pumah State Central Library pawmpui library 467 a awm meka ni.