MGNREGA-ah Mizoram sorkarin Sum chawi a nei lo: RD Under Secy.

Mizoram sorkara Rural Development changtu under secretary, Paul L Khuma chuan, MGNREGA hnuaiah Central sorkar sum rawn pek, Mizoram sorkarin a pek chhuah tlai vangin sum chawi a la nei lo niin a tarlang.

RD Under Secretary hian Vanglaini hnenah lehkha thawnin, Vanglaini May 21, 2015-a chhuakah kum 2014-15 chhung atan Central-in MGNREGA sum tur a rawn pekah Mizo­ram sorkarin implementing agen­cy (RD department) hnenah a pek chhuah tlai vangin cheng nuai 1336.9 a chawi anga tarlan chu a dik lo niin a tarlang a, “Mizoram sor­karin vawiin thleng hian sum cheng khatmah a la cháwi lo,” a ti.

Paul L Khuma chuan, Ministry of Rural Development-in sanction order a tihchhuah rualin sum chu Mizoram SEGF account-ah ni thum chhunga dah luh tur a nih thu a tarlang a, “Mahse a kalkawng a thui deuh avangin tihpui­tlin a harsa deuh ṭhin. Hei hi Mizoram sorkar chauh ni loin, state dang­te harsatna tawh ve mek tho a ni,” a ti a; chutih rualin, Mizoram sorkara Finance department leh RD department-te chuan MGNREGA sum chu a hma thei ang bera district tina pe chhuak turin hma a la ṭhin niin a tarlang.