Minister John-a'n LADC EM-te a kâwm Tourist lodge-te ADC kutah dah tum

Tourism minister John Rotluangliana chuan nimin khan Lawngtlai Circuit Hall-ah LADC executive member-te a kâwm a; Lawngtlai district chhunga tourist lodge-te enkawlnaah autonomous district council (ADC)-te'n thuneihna tam zawk an neih theih dan tur leh ṭangkai zawka hman a nih theih dan tur a sawipui.

John Rotluangliana chuan, district khawpuia mi ni lo, autonomous district council (ADC) huam chhunga tourist lodge-ah ADC-te'n thuneihna tam zawk an neih theih dan tur ngaihtuah mek a nih thu a sawi a, "Tourist lodge hi VIP leh sorkar hnathawkte tan bika sak ni loin, mipuite tana sak a ni. Mimal leh chhungkaw pawipanga zin ṭhinte'n tourist lodge-a thlen intihhmuh zel ang u. A thlen man pawh zângkhai tak tura duan a ni," a ti.

Minister ṭawiawmtu parliamentary secretary (Tourism) TT Zothansanga chuan, Mizoramah khualzin an pung zel tih sawiin, "Multi modal kawngte a tlang a, khawchhak lam ramte nena kan inthlunzawm tak tak hunah phei chuan khualzin hi kan ngah hle tura beisei a ni," a ti a; Mizoramin lodge ṭha leh changtlung neih belh zel a mamawh tur thu a sawi.

John Rotluangliana hian nimin vêk khan Saiha a pan a, Kawlchaw West khuaa roadside restaurant sak mek leh Kawlchaw East-a Supply kudam a tlawh ang.