Mizoram chhuahsantute Mizoramah hlân lêt

Sakhuana thil vanga Mizoram chhuahsana Myanmar rama lut, Champhai Tlangsam Venga chhungkaw pali aṭanga mi 19 zinga 18-te chu nimin kham Myanmar sorkarin Mizoram sorkar hnenah an hlan lêt. Mizoram chhuahsantu zinga pakhat chu Myanmar-ah a thi a ni.

Mi 18-te hi Zokhawthara Indo-Myanmar Border Trade Point-ah Champhai DC H Lalengmawia hoin lo hmuah a ni a; H Lalengmawia chuan, mi 18-te chhuah an nih theihna atana hma latu Myanmar rama Mizote fakin, "Ramri dan­ah cheng mah ila kan pian ken ziaráng tlawm­ngaihna hian min phuar khawm tlat avangin harsa leh buaina karah pawh unau kan nihna hi a lang chhuak ṭhin a ni," a ti.

Champhai Tlangsama mi 19-te chuan sakhuana thil vangin March 15, 2015 khan Tlangsam aṭangin kein Khawzim kâi kaltlangin Myanmar ramah an lut a; mahse March 24, 2015 khan Indo-Myanmar Border Trade Point, Moreh, Manipur ep, Tamu, Myanmar kiangah Myanmar sorkarin a man a ni.

Tamu-a Mizo Ṭhalai Pawl leh Tamu bialtu MLA D Thangliana (L) ten an hriat veleh theihtawp an chhuah a, Mizorama an kîr leh theihna turin hma an la zui nghal a ni.

Mi 18-te chu June 2, 2015 chawhnu khan Tamu Mizo Ṭhalai Pawl hruaitute'n Tamu aṭangin Tahan thleng an hruai a, Tahan Mizo ṭhalai Pawl (TMTP) hruaitute'n Tahan aṭanga Zokhawthar thleng rawn hruai lehin, Champhai DC hnenah an hlan ta a ni. Mi inhlannaah hian YMA sub-headquarters, Champhai hruaitute pawh an tel.