Hlawh pûk rulh theih chhan Consolidated Sinking Fund

Mizoram sorkarin Covid-19 vanga sorkar hnathawkte hlawh June leh July thlaa a bat­sak a rulh theih chhan chu, sorkar laipui leh Reserve Bank of India (RBI)-in Consolidated Sinking Fund lâk chhuah a phal vang a ni.

Finance department aṭanga thu dawn danin, state sorkarin state sum dinhmun a chhiat a, loan báte rulhna turin Con­solidated Sinking Fund-ah pawisa a dah khâwl ṭhin. Sorkar laipui leh RBI chuan Covid-19 vanga central tax aṭanga state sorkarte chan tur ang pek theih a nih loh avangin state-te'n an dil vang pawh ni loin Consolidated Sinking Fund hi lâk chhuah an phalsak a ni.

Consolidated Sinking Fund aṭang hian Mizoram sorkar chuan cheng vbc. 100 a la chhuak a; Fund hi hlawh pûk rulhna atan hman tur ni lo mah se, state sum báwm (Consolidated Fund)-a sum neih sa hmang loa loan rulh theih a nih avangin, sorkar hnathawkte hlawh bat chu rulh theih a ni. 

Zawhna chhangin Finance department hotute chuan, tun ṭuma Consolidated Sinking Fund lâk chhuah a nih avang hian loan pûk rulh kawngah harsatna an tawh phah an inrin loh thu an sawi.

RBI aṭanga special drawing facilities (special ways and means tih ṭhin) leh ways and means hmanga sum pûk a nih chungchangah Finance department hotute chuan, "Ni 90 chhunga rulh theih a ni a, kan rûl ve zel. Treasury khâr a ngaih loh kan beisei," an ti.

Mizoram sorkar hian kumin chhungin, August 15 thleng khan sorkar sum dinhmun a ṭhat loa sum pûkna ṭhin special drawing facilities (special ways and means tih ṭhin) leh ways and means hmangin RBI aṭangin ṭum 10 sum a pûk tawh a ni.