Covid-19 veiin MLA-te lehkha pe MLA 15-te fimkhur turin hriattir

Assembly Secretariat-a dâk semtu (despatch rider) David Lalramchhana'n Covid-19 a vei tih September 9-ah hmuh chhuah a ni a, dâk semtuin tun hnaia lehkha a pek MLA 15-te chu fimkhur taka awm turin Assembly Secretariat chuan September 10, Ningani khan hriattirna tichhuakin a hriattir.

Assembly secretary H Lalrinawma lehkha tihchhuahin a tarlan danin, David Lalramchhana hi Tuikhuahtlang Local Task Force member a ni a; Assembly-a dâk semtu a nih angin tun hnaiah - August 31 bakah, September 1, 2, 3 leh 8-ahte MLA-te chenna inah lehkha a sem kual a ni.

Hemi chungchangah hian Assembly speaker Lalrinliana Sailo chuan Vanglaini zawhna chhângin, Assembly rider-in lehkha a pek MLA-te chu fimkhur tura hrilh an nih rualin, inkhung (quarantine) turin an hriattir loh thu a sawi a, "Lehkha a sem hian an in chhungah a lut lo a, páwn lamah an inpe a ni," a ti.

Lalrinliana Sailo chuan, fimkhur thilah despatch rider-in lehkha a pek MLA-te chu swab sample endik tura ruahman a nih thu a sawi a, "September 3 leh a hma lama lehkha a pekte chu test a hun nghal tawh a, September 8-a a pekte erawh chu test a la hun lo deuh," a ti bawk.