KHAWTHLIR

Nimin khan Kolasib Chief Medical Officer quarters tualah 'Vaihlo leh Covid-19' tih thupuia hmangin State Anti-Tobacco Day vawi sarihna pualin vaihlo leh a kaihhnawi man khawmte tihchhiat a ni a, senior medical officer Dr RK Lalthlamuana'n a hmanpui a, Mizoramah Covid 19 avanga boral an la awm loh laiin vaihlo leh a kaihnawih avanga nunna chan anla awm belh zel thu sawiin, "Chuvangin, Covid-19 hrileng do chungin zuk leh hmuam pawh do chhunzawm a pawimawh," a ti. He hunah hian meizial carton 145 leh pack 3, Rs. 50,750 man leh Shikhar bâwm lian 32 leh báwm tê 52, Rs. 12,300 man tihchhiat a ni.

Lunglei Rahsi Venga PYD-te chuan nimin khan Lunglei Civil Hospital-ah thisen unit 21 an pe a, petute mipa 16 leh hmeichhia panga an ni. Bethlehem Vengthlang Tennis Club pawhin September 10, Ningani khan Aizawl Civil Hospital-ah thisen unit 18 an pe a, petute mipa 17 leh hmeichhia pakhat an ni.

September 10, Ningania Ramhlun South Local Council inthlana vote tlate chu zanah chhiar nghal a ni a, MNF party an chak ber. Ramhlun LC-ah hian seat pasarih a awm a, MNF-in seat pali, Congress party-in seat pahnih leh ZPM-in seat pakhat an la a ni.

Champhaia Legal Metrology enforcement leh Champhai Consumer Union chuan tun hnai khan Champhai khawpuia motor part zuar dawr hrang hrang an endik a, dawr 17 aṭangin an bungruaa MRP tihreh leh MRP aia toa hralhte an man. Dawr neitute chu Legal Metrology office-ah koh an ni a, dan angin hrem an ni.

Agriculture department hnuaia Sub-Mission on Agro Forestry (SMAF) chuan September 10, Ningani khan Lungleiah thlai chî an sem. Lunglei District Agriculture office hnuaiah SMAF hmalaknain Nghasih ramah thlai ṭiak 50,000 leh Chhûmkhûmah thlai ṭiak 25,000 enkawl a ni a, chu’ng hmun aṭang chuan loneitute tan thlai ṭiak an sem a ni.