Aizawl khawpuiah lockdown puan a ni

Mizoram sorkar chuan Aizawl Municipal Corporation (AMC) huam chhungah September 10, Ningani zanlai aṭanga September 17 zanlai thleng awh turin nêm deuh zawka inkhàrkhip (partial lockdown) a puang.

State Disaster Management Authority (SDMA)-in order a chhuah dan chuan, inthlahdul leh deuh a nih avangin mipui chêt velna a tam a, chutih laiin, Covid-19 vei hmuh chhuah thar tam tak an awm. Hripui vei hmuh chhuah thar ṭhenkhat chu an kaina chin hriat loh leh local positive contact-te an ni.

Tualchhunga hri inkaih darh zat chu state sorkar tan manganthlak tham a ni a, chuvangin, zau zawka inchhui (contact tracing) a ngai. Mipui vantlanga inkai darh (community spread) thlen a hlauhthawnawm a, chuvangin, hri darh zel tur vênna tura contact tracing leh test tihna atan leh, tualchhunga inkaih darh tihtlemna atan mipui chêt velna AMC huam chhungah khuahkhirh a ṭulin sorkartin a ngai a ni.

    Aizawl pâwn lam aṭanga khawpui chhunga luh leh khawpui aṭanga chhuah (zin veivah) khap a ni. Hei hian Home department-in Mizoram luh phalna a pek te, Mizoram páwna chhuak tur te, dam lohna (medical emergency) leh chhiat tawh thila chhungkhat hnai zual (pi leh pu, nu leh pa, tu leh fa leh pianpui unau)-te veivahna a huam lo. Medical emergency, chhiattawh thil leh Lengpui Airport aṭanga zin chhuak tur/lo haw turte thlah/lam turte chuan an awmna veng local task force phalna lak tur a ni.

    AMC páwn aṭangin ni tin mamawh leh bungraw dang (non-essential commodity) lak luh phal a ni. Bungraw châwk luh leh Aizawl aṭang/paltlanga bungraw thiar chungchangah Aizawl DC-in ruahmanna a siam ang.

    AMC area-ah ni tin mamawh zawrhna dawrte chu DC leh LTF-te ruahmanna siam angin hawn theih a ni. Dawrkaite'n anmahni dawrtute hman tur hand sanitiser dahin, inkar hlata awm tura tihna dan an zâwm ṭha tur a ni. Dawrtute hming, veng, phone number leh a hun ziahna chhawpin an ziahtir vek tur a ni.

    Mipui ni tin mamawh dawr hawn phalsakte chu (damdawi dawr tiam loin) tlai dar 5-ah khâr vek tur.

    Mipuiin awlsam zawka thlai leh chawhmeh an hmuh theih nan veng hrang hrangah LTF-te'n chawhmeh zawrhna tur hmun an ruahman ang a, metre 2 aia inhnaih lo turin ṭhutna an siam ang.

    Zirna-in, training institute leh sakhaw biakna hmunte khâr chhunzawm zel tur a ni. AMC chhunga undergraduate exam kal mek chu kalpui chhunzawm tur a ni.

    Mitthi vuinaah mi 50 aia tam punkhawm phal a ni lo. Mitthi vui chungchangah, chhiatni/ṭhatni chungchanga order August 13, 2020-a chhuah tawh chu kenkawh tur a ni.

    Aizawla chengte phalna nei loin tu mahin mahni in leh hung chhung chhuahsan loh tur. Phalna neia (dawr/office/damdawi-in, vantlang hmun) chhuak turte'n hmai tuam ngei tur a ni a, anmahni nihna tichiangtu photo identity card an ken ngei tur.

    Sorkar hnathawk, office kal tura tihte kal leh haw lam. Sorkar hnathawkte chu a tlem thei ang bera kal tur a ni a, department-a secretary, head of department/office-ten inkal chhâwk dan an ruahman ang. Essential service khawih department-te chuan mipuite'n harsatna an tawh lohna tur tâwkin ruahmanna an siam ang. Constitutional body-te leh Mizoram sorkar hnuaia statutory body, board, leh corporation-te pawh hetiang kal tur a ni.

    Covid-19 duty atana ruat bik sorkar hnathawkte leh LT member leh volunteer

    Medical leh veterinary emergency duty leh hospital-a thawk

    Mizoram Kohhran Hruaitu Committee member

    Bank, ATM, Postal, Telecom service provider leh Food Corporation of India-a thawk

    Print & electronic media, cable leh internet services a thawk

    Bawnghnute sem leh bawlhhlawh paih hna thawk

    Petrol pump leh LPG delivery-a thawktu

    Courier, home delivery leh e-commerce service

    Private security service-a thawk

    Airport aṭanga thlawhnaa haw, khung hran tur buaipuitu

    Mizoram University hnuaia post-graduate online exam buaipuitu faculty

    September 12 & 13-a Institute of Banking Personnel Selection (IBPS) exam turte leh exam buaipuitute

    September 13, 2020-a National Eligibility cum Entrance Test (NEET) exam turte leh exam buaipuitute

    September 17, 2020 aṭanga IGNOU hnuaia exam turte leh exam buaipuitute