Inthlan vanga Covid-19 vei an pung hi sorkar mawhphurhna a ni: ZPM Thalai
ZPM party ṭhalaite chuan thuchhuah siamin, sorkar chu village council leh local council inthlan vanga Covid-19 vei an pun nasat chungchangah mawhphurhna inbel ngam tur leh, hripui veite enkawlna chu tumsak vek turin Mizoram sorkar an phût.
ZPM Ṭhalai chuan, Mizoramah Covid-19 vei an pun chak dan enin, opposition political party-te'n VC leh LC inthlan buatsaih a hun loa hriain, sawn turin an ngen tih sawiin, "Chuti chung chuan inbuatsaihna chhe tak hnuaiah VC/LC inthlan neih a ni. Mizorama Covid-19 pun chhoh dan enin VC/LC inthlan hian nasa takin a tipung niin a hriat a, community transmission vanga kai tam tak an awm rin a ni," an ti a; contact tracing buaipui tur pawh thawktute tana luhaithlak khawp a nih thu an sawi.
VC/LC inthlan vangin Covid-19 hri vei nasa takin a pung nia a lan thu sawiin ZPM Ṭhalai chuan, "Mizoram sorkar hian mawhphurhna inbel ngam se la. Covid Care Centre (CCC) leh quarantine facility-a awmte ei leh in man leh an inenkawlna senso hi tumsak vek turin kan ngen a ni," an ti.
Swab sample endik man chu chhungkaw tam tak, endik duhte tan phurrit a nih avangin, Mizoram sorkarin endikna man man mipui chawi tura a tih chu titàwp nghal turin sorkar an ngen bawk.