Loneitute hnenah hmanrua sem a ni

Indian Council of Agricultural Research (ICAR) Research Complex for NE Region, Mizoram Centre, Kolasib bultumin Tribal Sub Plan hnuaiah nimin khan Kolasib-ah 'Promotion of Farm Mechanization for Increasing Net System Productivity and Cropping Intensity in Mizoram' tih thupui hmangin hun hman a ni a; bawrhsap Dr H Lalthlangliana'n loneitute hnenah hmanrua a sem.

Dr H Lalthlangliana chuan, an district-ah ICAR Research Complex a awm chu an district chhunga loneitute mai ni loin, Mizoram hmun hrang hranga kut hnathawktute tan hmasawnna leh hlâwkna nasa tak thlentu a nih mek thu a sawi a, "Taimakna hi tunlai thiamna nena hman kawp a nih chuan, hlâwkna nasa zawk a awm ṭhin a, loneitu taima leh dinchhuah tuma bei tak takte tan ICAR-a mithiamte râwn tur kan nei hi kan nihlawh hle a ni,” a ti. 

District Agriculture officer J Rothanga chuan, hmanraw dawngtute chu neitu nihna nen ṭha taka enkawl chhunzawm turin a chah a, "Mimal anga hma la hlawhtling tam tak hmuh tur an awm laia páwl anga hmalaknaah chuan hlawhtling tia chhiar tur an tlem. Hei hian pawl anga thawhhona kawngah Mizote hian zir tur hmabak kan ngah hle tih a tilangin ka hria," a ti a; hmanraw dawngtute chu páwl anga loneitu thlan chhuahte chu mi dang tana entawntlak ni tura a beisei thu a sawi.

Phaisen Kanan Group, WRC Farmer Association, Lawngtlai leh Chuailo FIG, Saiphai hnenah power tiller, water pump set leh pipe hlan a ni a; Serchhip Agriculture and Horticulture Farming Cooperative Society leh Bûkvanneia loneitu thlan chhuah pahnih hnenah water pump set leh pipe pek a ni bawk.