A thlâwnin buhfai leh chánâ sem

Sorkar laipui scheme, Atma Nirbhar Bharat (ANB) hnuaiah Food, Civil Supplies & Consumer Affairs (FCSCA) department kaltlangin Covid-19 hri lêng vanga tangkhang, harsatna tâwkte hnenah buhfai leh chánâ sem a ni.

ANB scheme hnuaiah hian mahni state ni loa awm te, National Food Security Act hnuaia ration card nei lote leh state sorkar aṭanga ration buhfai dawng ve lote hnenah thla khat atan buhfai a thlâwnin mi pakhat tan kg. 5 zelin kumin May leh June thla atan sem tur a ni. Mizoramah pawh ANB hi kalpui niin, sorkar laipui aṭangin buhfai metric ton 668.25 hmuh a ni tawh a, mi 23,694 hnenah pek a ni. Buhfai dawn tawh zawng zawng aṭangin metric ton 250.01 (37.41%) sem zawh a ni tawh.

ANB scheme aṭang hian chánâ metric ton 31 hmuh a ni a, mi 14,879-in an dawng thei. A dawng turte hnenah metric ton 29.75 (95.96%) sem tawh a ni.

Sorkar thuchhuah tarlan danin, buhfai leh chánâ dawngtu turte chu district hrang hrangah DCSO leh DC-te kaihhruainain thlan a ni. DC leh DCSO-te chuan a ṭul angin khaw/veng tinah local task force thawhpuiin, buhfai leh chana a thlawna pek tur an zawng ṭhin a ni.