Ṭanpui aia sawisel tur dapah MNF party-in Congress an puh

MNF party chuan thuchhuah siamin, Covid-19 dona atana mipui sum thawh tling­khawm hman dan chu tunlaiin Congress party-in an sawisel nasa hle tih an tarlang a, Congress party chu ṭanpui aia sawisel tur dap rengah an puh.

MNF chuan, CM Relief Fund chu sorkar hnathawk, pawlte leh mipuiin an thawh khawm a ni a, "MLA-te pawhin an thla tin hlawh aṭangin thla tin tam tham tak an thawh a, Congress MLA-te erawh chuan an thawh duh ve hauh lo. Chuti chung chuan Congress party chu a hman dan sawiseltu berah an ṭang zui a ni," an ti.

MNF tarlan danin, Lok Sabha MP C Lalrosanga'n MP fund awm lo chungin, pûk chawpin cheng nuai 15 Covid-19 do nan a thawh a, cheng nuai 100 dang pawh MP fund aṭanga pek a inhuam thu sawi a, mahse, MP fund tihtawp rih a nih avangin pek theih a ni lo. Chutih laiin, Rajya Sabha MP Ronald Sapa Tlau erawh chuan CMRF-ah cheng nuai 5 a pe anga MPCC-in an sawi laiin, a takah chuan Rs. 3,75,000 chiah a pe a ni.

Covid-19 dona atana CMRF hman dan tur chu Chief Secretary, Finance leh Health department-a thawk te, Mizoram Kohhran Hruaitu Com­mit­tee aiawhte leh tlawm­ngai pawl hotute'n hman dan tur an rél ṭhin nia sawiin MNF chuan, "A hman dan tur rawtna ṭha zawk nei intite chuan rawtna thehluh mai tur a ni," an ti.

MNF chuan, Mizoram chu India ramah Co­vid-­19 donaa ti ṭha ber state-ah puanzar mek a nia sawiin, "CM Pu Zoram­thanga kaihhruaina hnuaiah minister chak leh remhriate'n nasa taka hma an laka rim taka hna an thawh rah kan hmu chho mek a ni," an ti a; 'Congress sorkar laia thil thleng a ni ang tih a hlauhawm, ni ta se mipui kan va hrehawm dawn em,' tih chu mipui rilru niin an sawi bawk.